Млади активисти кои се борат против климатските промени, а никој не зборува за нив

Детали

вторник, 01 октомври 2019

Во септември целиот свет дозна за 16-годишната Грета Тунберг, која им се обрати на светските лидери на самитот на Обединетите нации.

Целта на Грета е да ја подигне свеста на луѓето за проблемот со климатските промени, а нејзиното залагање кулминира во неколку протести ширум светот.

Но, Грета не е единствената млада личност која сака да направи некоја промена. Ширум светот постојат многу млади активисти кои се борат против климатските промени, а за кои светот дефинитивно треба да слушне.

Отом Пелтиер

Отом е родена во 2004-та година и живее во северен Онтарио. Таа e позната по нејзиното залагање за чиста вода за пиење, а неретко е нарекувана и „воден воин“.

Со активизмот започнала на 8-годишна возраст, а била инспирирана од нејзината тетка.

Кога присуствувала на една церемонија во Канада, таа забележалa знак кој предупредувал дека водата не е за пиење. Тогаш сфатила дека не сите луѓе во Канада имаат пристап до вода за пиење.

Мери Копени

Мери е 11-годишна активистка која се бори за децата од Флинт, Мичиген.

Кога имала 8 години, таа и нејзиното семејство добиле забрана да пуштаaт вода во нивниот град, откако настанала криза.

Во овој тежок период, наместо да се чувствува беспомошно, Мери решила да ѝ помогне на заедницата и да се бори за децата во Флинт. Таа дури и му напишала писмо на тогашниот претседател Обама, со цел да привлече внимание кон проблемот во нејзиниот град.

Шија Бастида

Шија ги има искусено последиците од климатските промени од прва рака.

17-годишната девојка пораснала во суша, а еден обилен дожд го поплавил нејзиниот град, кој се наоѓа во близина на Мексико Сити.

Кога таа и нејзиното семејство се преселиле во Њујорк, пред четири години, Шија дознала за катастрофата што ја предизвикал ураганот Сенди. Бидејќи ѝ станало јасно колку всушност е голем проблемот со климатските промени, таа започнала клуб за зачувување на околината, во нејзиното училиште. Истовремено, им се придружила на неколку групи кои се борат против климатските промени.

Исра Хирси

Исра е 16-годишна активистка од Минеаполис и е еден од организаторите на глобалниот штрајк за климатските промени.

Додека била во основно, Исра се фокусирала на движењето Black Lives Matter. Подоцна, на 12-годишна возраст, таа помогнала во затворањето на Mall of America, додека барала правда за убиството на Џамар Кларк, 24-годишната жена која била убиена од полицајци.

Дури во средно сфатила дека и климатските промени се доста сериозен проблем, па почнала да работи во таа насока.

Леа Намугерва

Леа е 14-годишна активистка од Уганда која ѝ се придружила на Грета – секој петок таа штрајкува, со цел да се преземе нешто во врска со климатските промени, загадувањето со пластика и сличните проблеми.

Леа прв пат слушнала за Грета во 2018-та година, а кога сфатила дека се на речиси иста возраст, помислила дека и таа може да го прави истото.

Според неа, во Уганда се случуваат многу проблеми со околината, но медиумите ретко го покриваат тоа. Таа смета дека повеќето луѓе не се грижат за околината, возрасните не сакаат да понудат помош, па решила самата да волонтира.

Спирова С. | Црнбело