Кит „проголта“ кајакар, па го исплука: „Мислев дека сум мртов“ (видео)

Детали

петок, 14 февруари 2025

„Почувствував на лицето нешто лигаво и потонав. Во тој миг мислев дека ќе умрам“, раскажува 24-годишниот дечко кој случајно заврши во устата на грбав кит, но помина без никакви повреди.

Минатиот викенд, 24-годишен дечко и неговиот татко биле на кајакарење во Чиле.

Во еден миг, дечкото бил проголтан од грбав кит, но за среќа китот веднаш го исплукал.

Сега се појави и видео од инцидентот.

Грбав кит

Во видеото што се споделува вирално се гледа 24-годишниот Адријан Симанкас во вода со својот кајак.

Во еден миг, на површината излегува грбав кит и го проголтува заедно со кајакот.

Само секунда-две подоцна, се гледа како Адријан излегува на површината.

Во видеото, кое од CNN е потврдено дека е автентично, се слуша и татко му на Адријан кој го советува да се фати за кајакот.

Адријан поминал без никакви повреди, а за CNN даде и изјава за застрашувачкото искуство.

„Помислив дека ме изеде и ме проголта. Помислив дека можеби е орка кит. Зборувавме за нив претходно и мислев на тоа.

Но, кога излегов, сфатив дека веројатно китот ми се приближил од љубопитност…

На почетокот мислев дека сум мртов. Беше многу страшно бидејќи, помислив, не можам да направам ништо.

Кога излегов (на површината) бев исплашен дека нешто ќе му се случи и на татко ми. Се плашев и дека нема навреме да стигнеме до брегот и ќе добијам хипотермија“.

Адријан

Тој опишува и што видел додека бил во устата на китот, а излегол на површина благодарение на безбедносниот елек.

„Почувствував на лицето нешто лигаво, видов бои како темносина, бела, нешто ми се приближуваше и потонав.

Две секунди подоцна повторно бев на површината и почнав да сфаќам што се случува“.

Како изгледа грбав кит кога се храни

Татко му, пак, почнал да снима бидејќи видел бранови кои му изгледале „возбудливо за кајакарење“.

„Потоа слушнав нешто како силен бран и кога се свртев, не можев да го видам ни Адријан, ни неговиот кајак.

Се загрижив и по три секунди го видов на површината, со кајакот до него“.

Таткото на Адријан

За CNN, експерт за китови истакнува дека китот сосема случајно го нападнал Адријан и дека тој не бил проголтан, туку само на секунда влегол во устата на китот.

„Адријан бил премногу блиску до китот кога тој се хранел (со широко отворена уста). Но, не го проголтал.

Овие животни не ловат плен со големина на луѓе. Немаат способност да изедат човек“.

Погледнете го видеото:

Спирова С. | Црнобело