Убил над 50 луѓе, телото на 12-годишно момче го фрлил во киселина - Почина озлогласениот шеф на италијанската мафија, Матео Месина Денаро

Детали

понеделник, 25 септември 2023

Останките на човекот кој беше познат како „последен шеф на италијанската мафија“, се заклучени во мртовечницата на затворот, а до нив никој нема пристап – ниту најблиските. Што знаеме за смртта на Матео Денаро Месина, кој почина само 8 месеци откако беше ставен во затвор и не го дочека судењето за смртта на повеќе од 50 лица, меѓу кои и 12-годишно момче?

Озлогласениот шеф на италијанската мафија, Матео Месина Денаро, почина само осум месеци откако беше фатен од полицијата по 30 години бегство.

Денаро почина од рак на возраст од 61 година, во Италија беше познат како „последниот кум на мафијата“ или како „Ѓаволот“.

Според информациите објавени во италијанските медиуми, Матео починал во болницата на затворот L`Aquilla, каде бил хоспитализиран откако состојбата со ракот на дебелото црево значително му се влошила.

Тој последните осум месеци ги помина во затворска ќелија, а во петокот (22.09) паднал во кома. Се верува дека починал во текот на изминатиот викенд (23 – 24.09)

На посмртната постела со него била ќерка му Лоренца, внука му од сестра Лоренца Гутадауро и мајка му Лоренца Сантанџело.

Неговите посмртни останки биле преместени во мртовечницата на затворот во подземјето, а заради безбедносни причини ниту на неговите ќерка и внука не им е дозволено да имаат пристап до телото.

Се очекува прво да биде направена аутопсија, пред телото да му биде предадено на семејството за погреб.

По неговото апсење во делот на Кастелветрано, каде тој ‘владееше’ властите велат дека жителите можат конечно да дишат слободно без страв од озлогласениот шеф на мафијата.

Инаку, Денаро 30 години беше во бегство од полицијата, а се товареше дека извршил на 50 убиства, меѓу кои и на 12-годишно момче кое 2 години го чувал во заробеништво, а откако го задавил телото му го ставил во буре со солна киселина.

Се верува дека тој организирал повеќе смртоносни напади низ Италија, меѓу кои и врз обвинителите Џовани Фалконе и Паоло Борселино, а организирал и напади со автомобили-бомби во Фиренца, Милано и Рим во кои починаа 10 лица, 93 беа повредени во 1993-та година.

Се верува дека откако беше уапсен на 16-ти јануари годинава, во приватна клиника во Палермо, Денаро не дал никакви информации за полицијата, а во затворот не барал посебен третман за болеста.

Набрзо по неговото апсење зад решетки се најде и сестра му Розалија, која е верува дека му помагала да ја води организацијата додека тој бил во бегство, а ќерката Лоренца, пак е адвокат и на вујко ѝ, но и на мајката.

Денаро беше син на мафијаш, а на 15 години веќе почнал да носи огнено оружје со себеси. Се верува дека првото убиство го извршил на возраст од само 18 години.

Прочитајте и Извршил 50 убиства, се криел 30 години – Уапсен главниот човек на сицилијанската мафиja „Коза ностра“, Месина Денаро

Б. С. Б. | Црнобело