Корина Шумахер јавно проговори за животот со Михаел по несреќата: „На сите ни недостасува, но тој, иако е поинаков, сепак е тука!“

Детали

четврток, 09 септември 2021

„Никогаш не очекував дека нешто може да му се случи“ - низ солзи сопругата на Михаел Шумахер, Корина говори за нејзиниот живот по страшната несреќа во новиот документарен филм „Шумахер“ на Netflix.

Михаел Шумахер во 2013-та година претрпе несреќа на француските Алпи за време на скијање, кога удри во карпа и се здоби со сериозни повреди на главата иако носел заштитна опрема.

Тој беше на патувањето заедно со неговиот 14-годишен син Мик, а по несреќата, грижата за целото семејство, како и за болниот сопруг во целост падна врз плеќите на Корина, која со години се труди колку е можно повеќе да го заштити Михаел и јавноста да не дознае што точно се случува со него во однос на здравствената состојба.

Во новиот документарен филм посветен на Шумахер, членовите на неговото семејство говорат за него, но и за првпат по страшната несреќа дадоа увид во тоа каков е нивниот живот и неговата здравствена состојба.

Сопругата Корина, која е во брак со Михаел од 1995-тата година, за Михаел вели дека тој е „прекрасна личност“. Таа споделува повеќе интимни моменти, за тоа како се запознале, како стапиле во брак, но се осврнува и на нивниот приватен живот по несреќата:

„Никогаш не го обвинував Бога за тоа што се случи. Навистина беше лоша среќа – целата лоша среќа што некој може да ја добие во животот. Секогаш е тешко кога ќе се прашам: ‘Зошто ова му се случува на Михаел или ни се случува нам?’ Но, зошто, тоа истото им се случува и на други луѓе?

Ми недостига Михаел секој ден. Но, не сум само јас таа на која ѝ недостига. Им недостига и на децата, на неговиот татко, на сите околу него. Мислам на сите им недостасува Михаел, но Михаел е тука. Поинаков е, но тој е тука, и на сите ни дава сила.“

„Ние сме заедно. Ние живееме заедно. Имаме терапии. Правиме сè, за Михаел да се чувствува подобро и да му биде поудобно и да се чувствува како дел од нашето семејство. И без разлика на сè, ќе направам сè што можам. Ние сите ќе направиме сè што можеме“ – вели таа.

Понатаму таа проговори и зошто во последните неколку години прави сè за нивниот приватен живот да го држи подалеку од очите на јавноста. Како што вели, според неа Михаел постојано велел дека „она што е приватно треба да остане приватно“ и дека се обидуваат колку можат повеќе да се држат до неговите желби.

„Михаел секогаш нè штитеше, сега ние го штитиме него“ – вели таа.

Во филмот се појавуваат и двете деца на Михаел и Корина, Џина – Марија (24) и Мик (22). Мик тргна по стапките на неговиот татко и веќе ја гради кариерата како формула 1 возач, а во филмот и тој говореше за тоа кои се неговите цели:

„По несреќата, сите искуства, сите мигови што верувам дека многу луѓе ги имаат со нивните родители, јас веќе ги немам или се многу малку. Според мене тоа не е фер.

Мислам дека јас и татко ми, би можеле да се разбереме на поинаков начин сега. Само затоа што говориме сличен јазик – јазикот на мото-спортот – и дека би имале многу повеќе за што би можеле да разговараме. Мислам дека тоа би било супер... Би дал сè за да го имам тоа.“ – вели Мик.

Инаку, во новиот документарен филм објавени се и досега невидени видеа и интервјуа со членови на семејството како братот на Михаел, Ралф, а говорат и други колеги и блиски соработници, меѓу кои и Жан Тод, Барни Еклстон, Себастијан Фетел, Мика Хакинен, Дејмон Хил и други.

Погледнете го трејлерот за новиот докуметарен филм:

Прочитајте и Ja преживеа несреќата благодарение на сопругата – Која е Корина Шумахер и како Михаел ја возвишуваше?

Б. С. Б. | Црнобело