„Пријателите ме користеа за да се појават во нашето шоу, бев осамена“: Кендал Џенер мрази што е славна уште од детството

Детали

среда, 19 октомври 2022

„Се сеќавам дека во средно, седев во мојата соба и плачев со денови бидејќи Кајли имаше многу пријатели, а јас не и не знаев што да правам. До денес сум емотивна кога помислувам на тоа“ - Кендал Џенер вели дека трпела многу последици бидејќи пораснала пред очите на јавноста, а соучениците ја користеле со надеж дека ќе се појават на шоуто.

Најмладите сестри од кланот Кардашијан-Џенер – Кендал и Кајли – пораснаа пред очите на јавноста и, очекувано, ова имало негативно влијание врз нив.

Досега и двете девојки неколкупати имаат зборувано за цената што ја платиле за славата, а сега Кендал откри дека во детството била искористувана поради нејзиното познато семејство.

Во новото ријалити шоу на Кардашијанс, Кендал вели дека ѝ било особено тешко да се справи со славата на толку рана возраст.

Покрај тоа, многу соученици сакале да се појават на шоуто, па ја користеле Кендал со надеж дека ќе ги викне на гости додека се снима некоја епизода.

„Бев во основно кога почна да се емитува ријалити шоуто и пријателите на училиште беа чудни. Сакаа да доаѓаат кај мене на гости само за да се појават на шоуто“.

Поради ова, Кендал почнала да се оддалечува дури и од пријателите кои ѝ биле навистина блиски.

„Ми беше непријатно. Не викав пријатели дома за да не бидат на шоуто бидејќи ми беше чудно“.

Кендал истакнува дека и Кајли била во слична положба, но таа барем ја имала Хејли Бибер со која се дружи до денес.

Во поодамнешно интервју, Кендал зборуваше за осаменоста што ја чувствувала во детството.

„Се сеќавам, во основно и извесен период во средно немав многу пријатели. Седев во мојата соба и плачев со денови бидејќи Кајли имаше многу пријатели, а јас не знаев што да правам. До денес сум емотивна кога помислувам на тоа“.

Во некои мигови, Кендал мислела дека целиот живот ќе биде осамена.

„Никогаш не мислев дека ќе имам повеќе пријатели од Кајли. Нормално, не се натпреварував со неа за тоа, но таа изгледаше многу среќна со нејзините пријатели“.

Во друго интервју, Кендал открива дека во тинејџерските години многупати ги минувала деновите со нејзиниот коњ бидејќи немала со кого да се дружи.

Ова негативно искуство ја натерало Кендал да го крие приватниот живот што е можно повеќе. Па, поради ова во ријалити шоуто се откриваат малку детали за неа.

Имено, Кендал не можела да им верува ни на романтичните партнери, па поставила правило – никако да не се појавуваат на шоуто ако не се заедно повеќе од една година.

Ова го потврди и продуцентот на ријалити шоуто:

„Кендал отсекогаш го има ова правило бидејќи не ја знае намерата на луѓето. Поради ова криеме многу детали од нејзиниот приватен живот“.

Кендал има и проблеми со анксиозност, а вели дека постојаното внимание од јавноста само ѝ ја влошува состојбата, најмногу бидејќи нејзините фанови се убедени дека животот ѝ е лесен и нема никакви проблеми.

„И јас имам мозок. И некогаш тој… па не е секогаш среќен. На крај, и јас сум само човек“.

Иако во голема мера популарноста од ријалити шоуто ѝ помогна во кариерата како модел, Кендал вели и дека на почетокот било многу поразлично.

Наводно, поради ријалити шоуто, модните агенции не сакале ни да ја викнат на аудиција.

„Сите околу мене, пријателите и семејството, знаат колку напорно работев и дека уште работам за мојата кариера. Направив сè што треба за да станам модел.

Одев на секоја аудиција, одев насекаде не само во Њујорк, туку и низ Европа, за да добијам работа и да се пробијам.

Секако дека имав предност поради моето семејство. Свесна сум за тоа. Но, многу агенции не сакаа да ме ангажираат бидејќи бев дел од популарно ријалити шоу“.

Спирова С. | Црнобело