Бабата на Кајли и Кендал редовно ги критикува Кардашијанс: „Шоуто е глупаво, а внуките претераа со операции“

Детали

среда, 08 јуни 2022

Вели дека Крис ѝ го уништила животот на Кејтлин Џенер (порано Брус), дека шоуто на Кардашијанс е глупаво, но и дека ги осудува пластичните операции на нејзините внуки – Естер, мајката на Кејтлин, има само лоши зборови за кланот Кардашијан.

Естер Џенер е мајката на Кејтлин Џенер која честопати ги критикува Кардашијанс, но тврди дека многу ги сака Кендал и Кајли.

Исто така, таа долго време ја критикуваше и транзицијата на Кејтлин, а во една прилика изјави дека ќе продолжи да ја вика Брус, без разлика дали таа сака или не.

Последно таа даде изјава за The Sun во врска за свадбата на Кортни и Тревис и фактот дека Кејтлин не беше поканета. И, секако, ја искористи можноста за уште една критика кон Кардашијанс.

На прашањето дали смета дека Кејтлин е повредена што не била поканета, Естер изјави:

„Не знам ни дали воопшто ѝ е грижа. Немаме разговарано за тоа. Мислам дека новото шоу на Кардашијанс е најглупавото нешто што сум го изгледала. Но, го направија моите внуки, Кендал и Кајли, кои многу си ги сакам. Тие се моја крв. И другите деца – Ким, Кортни, Клои и Роберт – ги чувствувам како мои“.

Бидејќи ова не е првпат Естер да го критикува семејството, набрзо по нејзината објава се огласи и портпарол на Кејтлин:

„96-годишната мајка на Кејтлин е сенилна. Живее сама во дом. Кејтлин има најмено обезбедување кое внимава 24/7 бидејќи се плаши за нејзината безбедност. Сите коментари за децата Кардашијан-Џенер се само мислење на оваа жена и можат да бидат болни за Кејтлин“

Естер воопшто не ја сака Крис Џенер, поранешната сопруга на Кејтлин, и ја користи секоја можност за да истакне дека таа е личност којашто сака да контролира и дека ѝ го уништила животот на Кејтлин:

„Таа го претвори Брус (сега Кејтлин) во маж без самодоверба!“

Денес Естер отворено ја поддржува Кејтлин, но ѝ биле потребни многу години да ја прифати нејзината транзиција.

Пред неколку години, Естер изјави:

„Таа не го побара ова сама, ова е состојба која почнува уште во матката на мајката. Она што го знам за Кејтлин, а јас ја знам најдобро, е дека таа е посветена личност“.

Во 2014-та година, кога Крис и Кејтлин се разведоа, Естер веднаш даде интервју и го сподели нејзиното мислење за поранешната снаа:

„Мислам дека со сите се однесува лошо. Може да ве навреди со нејзината голема насмевка. Знаете што треба да правите со таква личност? Да ја избегнувате кога е возможно.

Таа им забодува ножеви во грбот на моите внуци, а јас не можам да го поднесам тоа. Многу е доминантна – сè мора да биде како што сака таа. Се држев понастрана од неа што е можно повеќе“.

Естер тврди и дека Крис ги контролирала сите пари на Кејтлин, но и дека била ужасна домаќинка и мајка.

„Сега откако си ја врати слободата, не мора да бара пари од Крис како претходно. Досега не можеше да си купи ништо без да побара пари од неа.

Крис никогаш не готвеше за децата и Брус требаше да се грижи за нив. Само тој менуваше пелени, не сум видела некогаш Крис да го направи тоа. Тој ги бањаше и им облекуваше пижами, тој ги носеше на училиште. Крис не правеше ништо“.

Тој период никој не знаеше дека Кејтлин сака да го промени полот, но почна почесто да се појавува со шминка, а имаше и долга коса. Но, на Естер не ѝ се допаѓале овие промени во изгледот.

„Му реков дека има 65 години, а ја носи косата како тинејџер бунтовник“.

Во истото интервју, Естер вели и дека многу ги сака нејзините внуки и е особено горда на нив, но дека Кортни и Ким не сакаат да зборуваат со неа. Нормално, и покрај тврдењата дека ги сака, ја искористи можноста да ги критикува:

„Боже, начинот на кој си ги рекламираат телата… И сите операции што ги имаат направено… Што сакаат да докажат?“

Откако Кејтлин ѝ соопшти на јавноста за својата транзиција со насловната страница на Vanity Fair, Естер се обиде да ја даде нејзината поддршка, но повторно со доза критика.

„Ќе ми биде тешко да се навикнам на промената, но многу сум среќна за него – или неа! Но, уште ќе го викам Брус. Јас и неговиот татко му го дадовме тоа име“.

Спирова С. | Црнобело