Поранешни вработени ги напаѓаат Кардашијанс: „Се фалат со богатството, а ние немаме пари за храна - мислат дека се кралско семејство“

Детали

четврток, 14 април 2022

„Работев постојано. Не спиев доволно. Почнав да пијам алкохол – премногу алкохол – за да се справам со стресот. Ми се уништи здравјето и почна да ми паѓа косата бидејќи немав време да се грижам за себе“.

Постојат многу гласини за ужасните услови за работа со кои се соочуваат вработените на сестрите Кардашијан-Џенер. Покрај ниската плата, поранешните вработени се имаат пожалено за предолги работни часови и, генерално, услови кои им го загрозуваат здравјето.

Пред околу еден месец девојка која порано работела како уредник на поранешните апликации на семејството Кардашијан објави вирален твит во кој ги обвинува.

Поради популарноста на твитот и многуте други луѓе кои ги споделија нивните непријатни искуства додека работеле за познатото семејство, сега девојката напиша и цела колумна на таа тема.

Таа го напиша твивтот како одговор на бизнис советите за жени што ги сподели Ким Кардашијан. 

Девојката, Џесика ДеФино, вели дека работела скоро секој ден, а имала толку ниска плата, што не можела да плати ни гориво за да отиде на работа.

Истовремено, надредените ја прекорувале бидејќи работела и фриленс за да може да заработи доволно за живот.

„Бев уредник на апликациите на Кардашијанс во 2015 година во Лос Анџелес. Работев и преку ден, навечер, и за викенди, а можев да си купам храна само од продавниците во кои сите продукти се по 1 долар. Неколкупати кажав дека сум болна бидејќи немав пари да ставам гориво во автомобилот за да отидам на работа, а бев прекорувана бидејќи работев и фриленс“.

I was an editor on the Kardashian apps in 2015 in LA, worked days nights & weekends, could only afford groceries from the 99 Cents Only Store, called out “sick” more than once bc I couldn’t put gas in my car to get to the office, & was reprimanded for freelancing on the side ❤️ https://t.co/mzvnTomjS3

— Jessica DeFino (@jessicadefino_) March 9, 2022

Според TMZ, со нивните апликации - кои бараа претплата за да се користат - Кардашијанс заработувале и до 32 милиони долари годишно.

Нивните апликации беа активни од 2015 до 2019 година.

Сепак, и покрај вртоглавата заработка, нивните вработени едвај сврзувале крај со крај.

Во новата колумна објавена на веб-сајтот Vice, Џесика открива дека заработувала 35.000 долари годишно. Во САД просечната годишна плата во 2015-та била речиси 60.000 долари.

Џесика вели дека со овие пари едвај можела да ги покрие најосновните трошоци, како храна, кирија и сметки.

Сето ова се одразило врз здравјето на Џесика која тврди дека била и во депресија.

Во колумната има изјави и od други луѓе кои биле во слична положба. Според нив, Кардашијанс сметале дека да се работи за нив е престиж, па поради ова си давале слобода да ги третираат вработените ужасно.

„Работев постојано. Не спиев доволно, Почнав да пијам алкохол – премногу алкохол – за да се справам со стресот. Ми се уништи здравјето. Почна да ми паѓа косата. Воопшто не се грижев за себе бидејќи работат мораше да ми биде приоритет“, гласи изјавата на девојка која сакала да остане анонимна.

Поранешните вработени истакнуваат и дека Кардашијанс не најмувале доволен број луѓе. Тие очекувале една личност да ја заврши работата на пет други.

Поради ова, од вработените се очекувало да бидат достапни 24 часа, буквално секој ден од неделата, а никогаш не биле платени за прекувремено работење.

„Таа е милијардер кој се фали со богатството, но сака само 2-3 луѓе на нејзиниот тим бидејќи не ѝ се даваат пари“, вели девојка која работела за модниот бренд на Ким Кардашијан.

Според друг поранешен вработен, Кардашијанс се гледале себеси како „кралското семејство од Америка“ и биле убедени дека секој би сакал да работи за нив, дури и за смешно ниска плата.

Прочитајте повеќе: Дава минимална плата, сите си даваат отказ – што откриваат поранешните вработени на Кајли Џенер за неа?

Спирова С. | Црнобело