Ким Кардашијан брутално искрена: „Се здебелив 30kg, бев отечена и мразев што сум бремена – постојано плачев“

Детали

понеделник, 16 август 2021

Поради критиките за вишокот килограми за време на првата бременост, Ким Кардашијан мразела што е бремена и постојано плачела, а по породувањето скришно вежбала во гаражата на мајка ѝ бидејќи ѝ било срам да оди во теретана поради уништената самодоверба.

Факт е дека за време на првата бременост, Ким Кардашијан се најде на мета на многу критики, само затоа што го зголеми бројот на килограми – нешто што е најнормално кај сите бремени жени.

Сега, пак, ријалити ѕвездата открива дека постојаните критики и коментарите полни омраза имале толку негативно влијание врз неа, што таа буквално ја мразела целата бременост.

Ким Кардашијан го доби првото дете – ќерката Норт – во 2013 година, со тогашниот сопруг Канје Вест. Во текот на бременоста, како и секоја жена и Ким се соочи со драстична промена на телото, но поради постојаните критики од јавноста, воопшто не уживала во овој период од животот.

Во поткастот на актерката Кристен Бел, Ким сподели дека сето ова ја натерало да ја мрази бременоста, но и дека ја убило нејзината самодоверба.

„Не изгледав добро за време на бременоста. Не бев слатка трудница. Не ми се допаѓаше. Мразев како се чувствувам, мразев како изгледам. Бев навикната да ги гледам мајка ми и сестра ми за време на нивните бремености, изгледаа одлично и породувањето им беше лесно. Животот им беше добар и веднаш се вратија на нозе. За мене не беше така“.

Ким можеби немала толку многу да се грижи за тоа како изгледа ако не беа бројните навреди на сметка на нејзиниот изглед.

„Беше лудо. Мислам дека денес овие коментари не би поминале. Не ми се верува дека критиките беа прифатливи и дека тоа беше во ред. Само седев дома и постојано плачев“.

За време на првата бременост, но и втората со синчето Сент, Ким имаше прееклампсија – сериозна компликација кај бремените жени која се карактеризира со симптоми како подуеност, отоци, висок крвен притисок и главоболки. Во некои ситуации компликацијата може да биде и фатална ако не се третира со медицинска помош.

Поради здравствената состојба, Ким ја роди првата ќерка шест недели порано, а открива дека за време на породувањето се појавиле и други компликации. Слична била ситуацијата и со втората бременост.

„Имав прееклампсија и не бев свесна за тоа. Поради нарушувањето имав многу потечени стапала и лице. Морав итно да се породам шест недели порано, а потоа имав и други компликации со двете најстари деца. Беше лудо“, вели Ким во интервјуто.

Поради сите проблеми, Ким одлучи другите две деца да ги добие со сурогат мајка. Всушност, и лекарите ѝ препорачале да не ризикува со бременост, бидејќи последиците можат да бидат фатални – и за неа, и за бебето.

Во интервјуто со Кристен, Ким вели дека по првото породување самодовербата ѝ била толку срушена, што веднаш почнала да слабее и скришно да вежба во гаражата на мајка ѝ.

„Тогаш немавме домашна теретана или нешто слично, а ми беше срам да одам во теретана. Не сакав луѓето да ме гледаат како се обидувам да слабеам. Во бременоста качив 30 килограми, а тој период температурата надвор сигурно беше и 40 степени.

Ја земав Норт со количка и ја оставав покрај мене и почнував да вежбам во гаражата и да пробувам да направам некоја вежба сè додека не успеам. Сето ова ме промени како личност“.

Ким Кардашијан има четири деца од бракот со Канје од кои две ги доби со сурогат мајка. По разводот со Канје, ријалити ѕвездата е сингл и не е познато дали сака уште деца.

Спирова С. | Црнобело