Почина Дејвид Линч, режисерот на Twin Peaks, на 78-годишна возраст, по долга битка со болест на белите дробови

Детали

петок, 17 јануари 2025

Дејвид Линч беше страстен пушач, почнувајќи од својата 8-годишна возраст, а поради оваа навика беше дијагностициран со белодробен емфизем. Неколку месеци пред смртта предизвикана од болеста, мораше да користи и кислородна поддршка за дишење.

Режисерот Дејвид Линч, најпознат по филмот Mulholand Drive и серијата Twin Peaks, почина вчера (16.01) на 78-годишна возраст.

Подолг период тој имаше проблеми со здравјето и не излегуваше од дома, а веста за смртта ја сподели неговото семејство, на неговата официјална Фејсбук страница.

„Со длабока жалост, ние, семејството, ја соопштуваме смртта на артистот Дејвид Линч. Би ценеле малку приватност во овој период.

Сега во светот има голема дупка бидејќи тој веќе не е со нас.

Но, како што самиот знаеше да каже: ’Фокусирајте се на крофната, не на нејзината дупка‘“.

Познатиот режисер беше препознатлив по филмовите со комплексни заплети и надреални елементи и, на некој начин, успеа да создаде свој жанр во Холивуд.

Неговиот прв долгометражен филм е Eraserhead кој беше издаден во 1977 година, а по неговиот успех, ги сними и The Elephant Man, Dune, Blue Velvet…

Со серијата Twin Peaks која почна да се емитува во 1990 стекна светска слава, а со Mulholland Drive си го зацементира статусот на еден од најдобрите и најуникатните режисери во Холивуд.

Приватно, режисерот беше дијагностициран со белодробен емфизем, поради што не можеше ни да излегува од дома.

Причината беше неговото хронично пушење цигари – навика што ја стекнал на само 8-годишна возраст.

Режисерот беше дијагностициран во 2020-та, а ги остави цигарите во 2022-ра, откако здравствената состојба му се влоши.

Неколкуте месеци пред неговата смрт, тој даде неколку интервјуа во кои зборуваше за проблемите со здравјето, но истакна дека никогаш нема да се пензионира.

Сепак, изјави дека ќе режира „на далечина“ за да си го зачува здравјето.

Во ноември 2024-та, режисерот сподели дека морал да користи кислород, а неговото дишење го опиша како да имал пластична кеса врз главата.

„Да, имам емфизем поради долгогодишното пушење.

Морам да кажам дека многу уживав во пушењето и го сакам тутунот, неговиот мирис… Но, има цена за ова уживање, а за мене таа цена е емфизем.

Не пушам веќе две години. Неодамна ми направија многу тестови и добрите вести се дека сум во одлична состојба, освен проблемот со емфаземот“, напиша режисерот на Твитер во август минатата година.

Иако режисерот бил свесен дека пуши премногу, секој обид да се откаже од цигарите за него бил безуспешен.

„Секојпат кога ќе се соочев со проблем, посегнував по цигара. И, повторно почнував да пушам“.

Зад себе, Дејвид Линч имаше три разводи, додека со четвртата сопруга беа разделени, без да се разведат.

Со првата сопруга, режисерот ја доби ќерката Џенифер, додека со втората сопруга доби два сина – Рајли и Остин.

По веста за неговата смрт, се огласија бројни актери и режисери кои или соработувале со него, или го ценеле како артист, вклучувајќи ги Стивен Спилберг и Кајл Меклахлан.

Спирова С. | Црнобело