Криси Тајген откри дека синот Мајлс (6) има дијабетес тип 1: „Вчера му дадовме прва доза инсулин“
- Детали
- четврток, 01 август 2024
„Го забележавте неговиот сензор за дијабетес тип 1 на раката. Може да биде многу полошо! Откако направивме неколку тестови, ни кажаа дека болеста е во почетна фаза“, изјави Криси Тајген за дијагнозата со дијабетес тип 1 на синчето Мајлс.
Пред неколку дена, Криси Тајген сподели фотка од неа, ќерката Луна и синот Мајлс, на која држат транспаренти со кои ѝ даваат поддршка на олимписката гимнастичарка од САД, Симон Бајлс.
Во коментари, многу од следбениците на Криси забележаа дека малиот Мајлс на раката има нешто што наликува на сензор за мерење на нивото на шеќер во крвта – направа што ја користат дијабетичарите.
Синоќа (31.07), по бројните прашања од фановите, Криси се огласи за здравствената состојба на 6-годишниот син и потврди дека има дијагноза дијабетес тип 1.
„Многумина од вас забележаа нешто посебно на фотката што ја објавив пред неколку дена – Луна, Мајлс и јас ги бодриме Симон и тимот на САД.
Раката на Мајлс е крената и многумина од вас со нас ги споделија најубавите зборови што сум ги видела на оваа платформа.
Го забележавте неговиот сензор за дијабетес тип 1 и ни испративте многу љубов и охрабрување. Бев и уште сум восхитена од добрината на оваа заедница.
Знам, може да биде многу полошо! Многу родители ширум светот минуваат низ страшни работи кои не можам ни да си ги замислам…
И, ние сме благословени што имаме голема помош и прекрасен и добар специјалист.
Пред неколку недели, нашиот Мајлс се разболе, беше во болница со тешка форма на шигела – инфекција на цревата предизвикана од бактерија во храната или водата.
Сите негови другарчиња беа заразени, бидејќи сите беа во истиот летен камп – па, некогаш се случуваат и такви работи!
Но, лекарите сфатија дека нешто друго не е во ред со неговата крвна слика. Тогаш дознав дека многу дечиња вака ја добиваат дијагнозата за дијабетес тип 1 – одат во болница за нешто потполно друго.
Откако направивме уште неколку тестови, ни кажаа дека болеста е во почетна фаза. Синоќа му ја дадовме првата доза инсулин…
Ова е ново за нас и дефинитивно учиме многу по пат.
Оваа објава е со цел да ви се заблагодарам за добрината. На Мајлс му помага тоа што знае дека многу други луѓе минуваат низ истото и дека не е сам“, пишува во објавата на Криси.
Таа сподели и фотка од сликовницата која му ја читале на Мајлс, а има за цел да му објасни што значи дијабетесот.
Засега нема лек за дијабетес тип 1, но болеста може да се контролира со инсулин.
Како што објаснува Криси, Мајлс е во почетна фаза на болеста, што значи засега му треба помала доза инсулин за контролирање на симптомите.
За потсетување, Џон и Криси имаат уште три деца покрај Мајлс – 8-годишната Луна, 1-годишната Ести и 1-годишниот Врен Александар кој го добија со сурогат мајка.
Спирова С. | Црнобело
Би можело да ве интересира:
Препорачуваме
Најчитани неделава
