Ребел Вилсон: „Ја изгубив невиноста на 35 години, мислев дека не сум привлечна поради вишокот килограми“

Ребел истакнува и дека бидејќи била исплашена од интимност, ја користела својата тежина како изговор.

„Има многу луѓе кои го одложуваат сексот додека да ослабат – ’Ќе ослабам пет килограми, па тогаш ќе барам дечко‘. Но, мислам дека тоа нема никаква врска со тежината или големината, туку со самодовербата што ја проектирате.

Јас ја користев мојата тежина како изговор да избегнувам интимност, и сега посакувам да не го правев тоа. Ако му се допаѓате на некој, му се допаѓате. Барем сега ја научив таа лекција“.

Пред издавањето на мемоарите, актерката имаше интервју за People, каде првпат зборуваше за првиот сексуален однос.

Во интервјуто, 44-годишната актерка порачува дека не мора сите да го имаат првиот сексуален однос во тинејџерските години.

„Луѓето можат да чекаат додека се подготвени или да чекаат додека се малку позрели. И, мислам дека ова може да биде позитивна порака.

Нормално, не мора да чекате до 30-тите како мене, но не треба ни да чувствувате притисок додека сте млади“, вели таа во интервјуто.

Сепак, Ребел истакнува дека подоцна била засрамена од фактот што немала односи, па ја избегнувала темата по секоја цена.

„Еднаш ѝ кажав на најдобрата пријателка дека ја изгубив невиноста на 23 години, само за да ги избегнам понатамошните прашања за тоа“.

Денес актерката е свршена со дизајнерката Рамона Агрума и во 2022-ра добија и дете со сурогат мајка.

Во интервјуто, Ребел вели дека ако била родена 20 години подоцна, веројатно порано ќе ја истражела својата сексуалност.

Актерката сметала дека ја привлекуваат мажи, следејќи го примерот на другите жени околу неа. Но, подоцна сфатила дека ја привлекуваат и жени.

По објавувањето на интервјуто, на социјалните мрежи почна да се шпекулира дека изјавата на Ребел за нејзината невиност е дел од првоаприлска шега.

„Посакувам да беше првоаприлска шега, но не е. Си имав помислено дека ако ја загубам невиноста пред 40 години, нема да биде толку лошо. Полоша ќе биде стигмата поврзана со сето тоа.

Но од друга страна, мило ми е што ја загубив невиноста како што јас сакав. На таа возраст бев повеќе од подготвена“, вели актерката во друго интервју.

Таа се шегува и дека ако ништо друго, барем немала сексуално преносливи болести додека била на факултет.

„Има некои добри работи за сето ова. Но, мислам дека најмногу сакам да им помогнам на луѓето да не се чувствуваат сами. Многумина ми напишаа пораки дека и тие ’процутеле‘ доцна.

Младите луѓе не треба да чувствуваат притисок да бидат сексуализирани на рана возраст“, додава таа.

Спирова С. | Црнобело