Злокобни, морничави трилери кои оставаат горчлив вкус во устата

Некои книги имаат моќ да создадат многу помоќен „филм“ во умот за разлика од оние на филмското платно или ТВ екраните.

Доколку сте од читателите со живописна имагинација кои сакаат да анализираат и дозволувате да води дејствието на книгата заборавајќи да се напиете дури и чаша вода, имаме 3 одлични предлози за вас.

Морничави трилери кои ќе остават долготраен спомен и по малку горчлив вкус во устата:

Куклената претстава – М.В. Крејвен

Сериски убиец ги пали своите жртви на познатите праисториски камени кругови во Лејк Дистрикт. Тој не остава никакви траги и полицајците се беспомошни. 

Кога на јагленосаните остатоци од третата жртва го наоѓаат врежано неговото име, му ја прекинуваат суспензијата на посрамотениот детектив Вашингтон По и го вклучуваат во истрагата од која тој дефинитивно не сака да биде дел.

Како партнерка ја добива генијалната, но социјално неприспособена аналитичарка Тили Бредшо и заедно пронаоѓаат трага која е оставена за да ја види само тој. Загадочниот убиец има план и од некоја причина По е дел од него.

Мртва трка – Бенедек Тот

Мртва трка е сурова егзистенцијална приказна за безнадежноста во еден провинциски град кој може да се наоѓа каде било во светот.

Со својот разговорен јазик, неа ја раскажуваат неколку тинејџери чии денови минуваат меѓу училиштето, тренинзите во базенот и решеноста да ги пробаат сите забранети овошја на животот, дури и по цена на сопствениот живот.

Од една страна, имаат сè што сакаат – дрога, секс, брзи автомобили, видеоигри. Но од друга страна, немаат ништо: нивната иднина е лишена од можност за интимност или радост.

Нивните насилни импулси се исто толку бесмислени колку што се сурови и одбивни. Како во бунило, оставаат да бидат носени од настаните сè додека главниот меѓу нив, богатиот Патка, не го убие плашливиот Золика.

И тогаш почнува да се крева маглата од нивните глави и да се наѕира вистината. А таа е навистина страшна…

Гробна тишина – Арналдур Индридасон

Истрагата на исландската полиција започнува кога на дамнешните ненаселени ридови на периферијата на Рејкјавик е пронајден човечки скелет, стар неколку децении.

Разгледувајќи го овој одамна застарен случај, детективот Ерлендур и неговиот тим откриваат дека ридовите околу главниот град кријат неколку трагични приказни кои се случиле во дамнешното минато: за насилство, изгубена љубов и чест, криминал…

На овој начин, во романот се мешаат неколку жанрови, кои само дополнително ја зголемуваат тензијата среде мрачната атмосфера на исландското осамено секојдневие.

(О)Милена | Црнобело