Одлични книги чии главни ликови излегуваат од шаблонот на обични, здодевни луѓе

Доколку вашите фаворити се необични и несекојдневни книжевни ликови кои излегуваат од шаблонот на предвидливите карактери, тогаш следниот избор на книги е дефинитивно наменет за вас.

Секако, понекогаш чувствуваме повеќе емпатија кон негативецот отколку кон добриот лик. Чуден феномен, но тоа е магијата на добрата книга, како на пример:

10 минути и 38 секунди во овој чуден свет – Елиф Шафак

Турската книжевна кралица Шафак создала уште едно ремек-дело кое не смеете да го пропуштите. Не останува ништо друго освен целосно да се соживеете со нејзината хероина во најновиот роман – Леила Текила и нејзините 5 необични, чудни, искрени пријатели. 

Роман за различноста, за суровоста на животот, но и сета убавина која се крие во навидум обичните нешта.

Парфем – Патрик Зискинд

Генијално, вознемирувачко, богато и сликовито раскажано од првата до последната страница. Малиот Гренуј се раѓа среде валканиот смрдлив пазар и уште од малечок е надарен со неверојатно сетило за мирис. Тука започнува и неговата опсесија – да го пронајде најсовршениот мирис на светот.

Чудо – Р.Џ. Паласио

Запознајте го Оги Пулман. Тој за првпат тргнува на училиште, а веќе е петто одделение. Причината поради која се криел од светот? Ужасното деформирано лице кое не може да се поправи и покрај многубројните хируршки зафати.

Неверојатна топла, тажна, но и забавна приказна за момчето кое е похрабро отколку што можете да си замислите.

Мемоарите на Шерлок Холмс – Артур Конан Дојл

Зарем му е потребно специјално претставување на еден од најомилените детективски херои на сите времиња – Шерлок Холмс? Класична збирка од 1894 година, во која на Холмс му се даваат подлабоки димензии, а заплетите стануваат сè помрачни и покомплексни.

(О)Милена | Црнобело