Тијана, девојката која стои зад носталгичните честитки од Скопје: „Имаме богато архитектонско наследство, а за жал не го вреднуваме“

Детали

петок, 06 декември 2024

„Целта ми е преку креативен начин да поттикнам интерес кон тоа што го имаме како богато архитектонско наследство, а за жал не го вреднуваме доволно“ - вели за CRNOBELO.com Тијана, архитектката која стои зад носталгичните честитки со новогодишни мотиви на познати скопски локации. 

Деновиве на социјалните мрежи вирален хит се носталгичните новогодишни честитки на кои се прикажани некои од најатрактивните архитектонски градби во Скопје и неколку други градови, со доза на топлина во самите илустрирани прикази.

Станува збор за илустрации кои се дело на Тијана Стојковска од Куманово, која по професија е архитект, а во слободно време носталгичар за некои подобри минати времиња, како што самата се претставува.

Илустрациите и колажите ги изработува во Photoshop, а за CRNOBELO.com вели: „Можеби тоа е мој начин да го искористам најдоброто од времето во кое живеам, претставувајќи го минатото кое го романтизирам“.

Овие нејзини дела на прва потсетуваат на ретро честитките кои ги купувавме на плоштад, но за разлика од нив, на овие има насликано вистинско богатство и дефинитивно не оставаат никого рамнодушен.

Заљубен пар кој се прегрнува во Порта „Влае“, детски џагор и игра кај старата железничка станица, правење Снешко пред кулите од Градски ѕид, санкање на снег - сите овие моменти кои будат спомени поставени на позадина на некои од најпрепознатливите скопски локации, кои се значајни за македонската архитектура, прикажани низ начин на кој таа ги доживува.

За CRNOBELO.com Тијана открива од каде инспирацијата за овие дела, но и какви ѝ се желбите за во иднина:

„Воедно и една од главните причини за изработка на новогодишни честитки е носталгијата по детството и убавината во споделување желби со блиските луѓе, иако новогодишните честитки не се мој првичен начин на претставување на македонската архитектура.

Во текот на изминативе години имам создадено различни колажи и илустрации кои се моја реинтерпретација на македонската архитектура, начинот на кој јас ја доживувам во комбинација со надреални елементи.

Ваквите колажи беа изложени на мојата прва самостојна изложба „Поинакви архитектонски доживувања“ која се одржа минатата година, во галеријата Pioneri art platform. Целта ми е преку креативен начин да поттикнам интерес кон тоа што го имаме како богато архитектонско наследство, а за жал не го вреднуваме доволно.

Предмет на интерес не ми се само објектите од Скопје, туку од целата земја, најмногу од причина што јас сум по потекло од Куманово, но свесни сме дека најголемото изобилство на вредни примери од архитектурата има во Скопје. Токму затоа и архитектурата во Скопје е најзастапена во моите дела.

Во претстојниот период се надевам дека ќе успеам да создадам нешто ново со фокус на традиционалната и еклектична архитектура, карактеристична за сите градови во Македонија, па којзнае можеби и уште некоја мала изложба“.

Уште неколку нејзини дела од колекцијата новогодишни честитки и колажи на препознатливи локации во Скопје, но и неколку други градови:

Станбен објект на ул. „Орце Николов" - Скопје / Лудјек Кубеш (1952-1954)

Детско одморалиште „Титови пионери" - село Николиќ, Дојран

Скопски саем - Скопје / Славко Ѓуриќ, Благоја Мицевски (1970 - 2018)

Дом на култура - Куманово (1980)

Бензинска пумпа - Охрид / Ѓорѓи Голев (1972-73)

Архив на град Скопје / Георги Константиновски (1967)

©CRNOBELO.com Забрането преземање и копирање. Крадењето на авторски текстови е казниво со закон.

М. М . | Црнобело