Македонската балерина Стефанија Гаштарска меѓу најдобрите 8 во Русија, според „Форбс“

Детали

вторник, 29 октомври 2024

„Ах, драги хејтери, страшно ме мотивирате, сфатете го тоа“ порача младата македонска балерина Стефанија Гаштарска, која на само 18 години стана дел од престижниот руски балетски ансамбл „Болшој“, а на 23 години ја вборјуваат меѓу најдобрите 8 балерини во Русија.

Младата македонска балерина Стефанија Гаштарска, е избрана според престижниот руски магазин „Форбс“ меѓу осумте млади балерини кои се надежта на рускиот балет.

Фото: Forbes - Принтскрин

Стефанија ја сподели оваа информација на своите профили на социјалните мрежи, а упати и силна порака до сите оние што ја критикувале и упатувале непримерни коментари до неа во минатото:

„Ах, драги хејтери, страшно ме мотивирате, сфатете го тоа. Многу љубов, ваша Стефи“ – напиша таа над објавата за нејзиниот успех.

Инаку, Стефанија (23) е млада македонска балерина, која потекнува од балетско семејство, а од најмлади нозе сакала да биде дел од руската балетска сцена.

Стефанија е ќерка на нашата балерина Марија Крстевски, а на 15 години се одлучила да учествува на отворениот натпревар за руски балерини „Арабеска“, што се одржал во Перм.

Таму брзо бил забележан нејзиниот талент, a oткако една година учела во Училиштето за кореографија во Перм, успеала да се запише и на Московската академија за кореографија.

За жал, ковидот и пандемијата го попречиле крајот на нејзините студии, но пред тоа, со нејзините изведби за време на училишните претстави успеала да ја импресионира публиката во „Болшој“ и на возраст од само 18 години, таа стана првата Македонка која била дел од овој престижен балетски ансамбл.

Сега, руската балетската колумнистка Ана Галајда состави текст за руското издание на „Форбс“, каде ги именуваше младите балерини и балетани кои се иднината на рускиот балет.

Стефанија е доказ дека желбите можат да станат реалност, а напорната работа и трудот, секогаш на крајот може да вродат со плод.

Прочитајте и Каква мајка, таква ќерка – Нашите балерини Марија и Стефанија се доказ дека гените се чудо

Б. С. Б. | Црнобело