Славчо Попоски, метеоролог: „Поројни дождови и можна појава на првиот мраз за оваа сезона“

Детали

понеделник, 16 септември 2024

„Наутро, на многу места температурите ќе се спуштат под 10 степени Целзиусови, а некаде и под 5 степени Целзиусови“, вели Славчо Попоски.

Слично како минатата недела, и оваа ќе биде проследена со врнежи од дожд, силен ветар, како и услови за појава на грмежи.

Температурите, пак, ќе бидат под просекот за овој период.

Во продолжение, прогнозата на Славчо Попоски за претстојната недела:

„Циклонската активност која нè зафати уште од изминатата седмица, продолжува и во текот на оваа, и истата ќе условува да имаме чести повремени локални врнежи од дожд и тие локално ќе бидат поројни и проследени со грмежи, како и со засилување на ветерот.

И во скопскиот регион, во текот на оваа седмица продолжува променливото време со повремени врнежи од дожд.

Во делови од котлината тие повремено ќе бидат поројни и со услови за појава на грмежи, како и со засилување на ветерот.

Што се однесува до температурите, тие остануваат невообичаено ниски за месец септември.

Па така, наутро на многу места ќе се спуштаат и под 10 степени Целзиусови, понекаде и под 5 степени Целзиусови, а особено на високите планински места, температурата очекуваме да се спушти и околу нулата, со што е можна и појава на првиот мраз за оваа сезона.

Преку ден, исто така, останува свежо со максимални дневни температури кои ќе се искачуваат во интервалот од 16 до 24 степени Целзиусови.

Во Скопје наутро температурата ќе се спушта во интервалот помеѓу 9 и 14 степени Целзиусови, додека максималната дневна температура ќе се искачува во интервалот помеѓу 21 и 24 степени Целзиусови“.

Спирова С. | Црнобело

фото: Фејсбук, freepik.com