„Ајде Охриде, за спас на Галичица“ – Апокалиптични фотки од пожарот, Трпејца обвиена во чад

Детали

четврток, 15 август 2024

„Секој ден слушаме авиони кои прелетуваат на планината, собираат вода од Охридското Езеро и го гаснат пожарот“ – споделуваат на социјалните мрежи охриѓани, кои денес масовно се мобилизираат за да го изгаснат пожарот на Галичица.

По социјалните мрежи се шират апокалиптични фотографии од пожарот на планината и националниот парк Галичица.

Охриѓани и преспанци со неверување ги споделуваат фотографиите на социјалните мрежи на кои се гледа како гори шумата на планината која ги дели Охридското и Преспанското Езеро.

Како што информираа од ЦУК, пожарот во изминатите денови горел на планински предел од 2.000 метри надморска височина, каде пристапот е возможен само со пешачење од најмалку 2 часа, а во неколку наврати тимовите на ТППЕ Охрид и Ресен биле транспортирани со хеликоптер на МВР.

фото: Фејсбук - ТППЕ Охрид - Пожарна 

Но, и покрај 10-дневните напори на пожарникарите, ренџерската служба на националниот парк Галичица, волонтерите на Планинската спасителна служба на Црвениот Крст, планинскиот пожар продолжи да се шири, и состојбата станува алармантна.

фото: Фејсбук - ТППЕ Охрид - Пожарна 

Синоќа (14.08) на Фејсбук групата „Охриѓани“ е објавен апел за мобилизација на волонтери, кои би се вклучиле во гаснењето на пожарите.

„И со Националниот парк ‘Галичица’ сме во контакт, кој не е во можност да оди до планинарската куќа ‘Спиридон’, на Галичица, може во 5 и пол утре да се пријави пред пожарната во Охрид.

Кој е во можност да оди со сопствено возило, може да оди и да се пријави кај рампата за местото викано Војтино (тоа е 100 метри над наплатната рампа)!“

Значи и кај Спиридон и кај НП Галичица се бараат доброволци!

Ајде Охриде, за спас на Галичица“ – стои во апелот.

https://www.facebook.com/Ohrigani.mk/posts/pfbid0231iWjc16XH9BQAiYMeBdbfxg1i588guURAuzkFWoL3TiK46Y3ghRUR8qHM5YVHw4l

Инаку од доброволците се бара да бидат физички подтотвени со базична планинарска опрема, а со себе да понесат мотика или гребло!

фото: Фејсбук - ТППЕ Охрид - Пожарна 

На истата Фејсбук група е објавено едно видео на кое се гледа дека македонското „Сен Тропе“, Трпејца, вчера била целосно обвиена во чад.

https://www.facebook.com/Ohrigani.mk/videos/1230462391468879

На социјалните мрежи се споделени голем број фотографии од жители и туристи кои во моментов се наоѓаат на брегот на Охридското Езеро.

Фотографот Стојан Стојановски сподели фотографија од кампот Љубаништа на брегот на Охридското Езеро, од каде може да се види огнената стихија и чадот кој се надвиснал над Охрид.

Фотографот Ристе Спироски од Охрид, исто така сподели фотографија од пожарот на Галичица, направена од Трпејца.

„Голем шумски пожар на планината Галичица и метеор.

Пожарот станува сѐ поголем, полека се доближува до населените места.

Секој ден слушаме авиони кои прелетуваат на планината, собираат вода од Охридското Езеро и го гаснат пожарот“ – напиша тој.

И на Tвитер се споделени неколку фотографии од пожарот кој може да се види од Охрид.

Б. С. Б. | Црнобело