Славчо Попоски, метеоролог: „Пеколните температури продолжуваат во август, ќе биде и спарно поради прашина од Сахара“

Детали

понеделник, 05 август 2024

„Годинава, месец август ќе бидете потопол за 1 до 2 степени Целзиусови, а врнежите ќе бидат потпросечни“, вели Славчо Попоски за претстојниот месец.

Освен натпросечно високите температури, во август веројатно нема да видиме врнежи од дожд, освен можеби краткотрајно невреме овој викенд.

Покрај тоа, ќе има присуство и на прашина од Сахара, што ќе го направи времето спарно.

Во продолжение, прогнозата на Славчо Попоски за месец август:

„Во претстојниот месец август, повторно очекуваме многу топло време и натпросечно високи температури на воздухот.

Тоа значи дека оваа година месец август ќе биде потопол за 1 до 2 степени Целзиусови, а врнежите ќе бидат потпросечни, односно претстојниот месец ќе биде посув од вообичаеното.

Овој топол бран кој ја зафати нашата територија, во следните денови ќе зема замав и температурите на воздухот насекаде во Македонија ќе надминуваат 30 степени Целзиусови, додека во најтоплите централни и југоисточни предели, како и во Скопската Котлина, температурата ќе се искачи до околу 40 степени Целзиусови.

Во следниот период, во атмосферата ќе ни биде присутна и сахарската прашина и песок, па времето ќе биде мачно и спарно, а температурите ќе ги чувствуваме како да се повисоки од реално измерените.

Само за време на овој викенд ќе имаме краткотрајна дестабилизација на времето, кога ќе има локална појава на пороен дожд, грмежи, засилен ветер и услови за локално невреме.

УВ индексот и во следните денови ќе има многу висока вредност и ќе има коефициент некаде помеѓу 8 и 9“.

Спирова С. | Црнобело

фото: Фејсбук, freepik.com