Славчо Попоски, метеоролог: „Можно е невреме во текот на неделата, температурите значително ќе опаднат“

Детали

понеделник, 22 јули 2024

„Во делови од Скопската Котлина во попладневните часови ќе биде нестабилно со пороен дожд, грмежи и засилен ветер. Можна е и појава на невреме“, вели Славчо Попоски.

Топлотниот бран со температури и до 40˚C трае повеќе од две недели. Освен краткотрајните врнежи минатата недела, изминатиов период не видовме ни облак на небото.

Сепак, според последните прогнози, сосема возможно е во текот на неделата да забележиме промена на времето, па дури и невреме.

Во продолжение, прогнозата на Славчо Попоски за претстојната недела:

„Во текот на оваа нова работна седмица во Македонија, особено во попладневните и во вечерните часови, ќе има локален развој на нестабилна облачност проследена со пороен дожд, грмежи и засилен ветер.

Локално процесите ќе бидат поинтензивни и застапени во форма на невреме, проследено со поројни врнежи од дожд, силни грмежи и електрични празнења, силен ветер и со појава на град.

И во делови од Скопската Котлина во попладневните часови ќе биде нестабилно со пороен дожд, грмежи и засилен ветер. Можна е и појава на невреме.

Апелираме, во случај на појава на невреме и на силни електрични празнења, да не се престојува на отворен простор и под осамени дрвја.

Што се однесува до температурите, тие за разлика од изминатите денови, секојдневно ќе бележат тенденција на постепено опаѓање.

Позначително ќе опаднат кон крајот на оваа работна седмица и тие ќе бидат потпросечни за месец јули и ќе се искачуваат во интервалот од 25˚C до 33˚C, додека наутро тие ќе се спуштаат во интервалот помеѓу 10˚C и 19˚C“.

Спирова С. | Црнобело

фото: Фејсбук, freepik.com