Славчо Попоски, метеоролог: „Неделава натпросечно топло време, со мала можност за краткотраен дожд“

Детали

понеделник, 02 септември 2024

„Во скопскиот регион оваа недела ќе биде натпросечно топло, но повремено можна е ретка појава на краткотраен пороен дожд“, вели метеорологот Славчо Попоски.

Високите температури ќе продолжат и во првата недела од септември, а иако постои можност за краткотраен дожд, сепак е многу мала.

Во продолжение, прогнозата на Славчо Попоски:

„Во текот на оваа работна недела во Македонија ќе имаме натпросечно топло време (продолжено лето), со температури кои ќе се искачуваат во интервалот од 27 до 36 степени Целзиусови.

Сепак, наутро ќе биде релативно свежо со минимални температури кои ќе се искачуваат во интервалот од 11 до 20 степени Целзиусови.

Времето во текот на оваа работна недела ќе биде сончево, повремено со умерена облачност, која локално би можела да биде и позначителна.

Особено во планинските предели, во попладневните часови очекуваме и конвективен развој на грмотевични облаци кои би условиле појава на краткотрајни поројни врнежи од дожд, грмежи и засилување на ветерот во зоната на нестабилност.

И во скопскиот регион оваа работна недела ќе помине во знакот на натпросечно топло и претежно стабилно време.

Сепак, повремено во попладневните часови не се исклучува можноста за ретка појава на краткотраен пороен дожд и грмежи.

Наутро, температурата во Скопје ќе се спушта во интервалот помеѓу 16 и 17 степени Целзиусови, додека преку ден таа ќе се искачува во интервалот помеѓу 34 и 35 степени Целзиусови.

Спирова С. | Црнобело

фото: Фејсбук, freepik.com