Македонки плетат ќебенца за децата без родители – Зошто овој проект ми го стопли срцето?

Детали

четврток, 18 април 2024

Секое дете заслужува љубов и топлина! - Со оваа помисла одлучив да се вклучам во проектот на група Македонки кои плетат ќебенца за децата кои растат без родителска грижа. Сфатив дека со моите две раце можам да направам нешто за да помогнам таму каде што сум потребна, а тоа нема да ме чини ништо.

Пред да почине, мајка ми сплете розово меко ќебенце за ќерка ми.

Знаеше дека сум бремена и дека носам девојче, па избрала соодветна „пембе“ розова боја и заедно со куклите и облеката што ја донесе како подарок, го стави и ќебенцето.

„Да ви се најде“ – ни рече!

фото: Pinterest

Мајка ми не е со нас веќе неколку години, а ќерка ми порасна со ќебенцето. Денес има седум години, па често кога е вознемирена и уплашена знае да се стутка под плетеното ќебенце од баба за да се стопли.

„Секое дете заслужува таква љубов и топлина!“ – си мислам кога ја гледам така стуткана.

фото: Pinterest

Можеби таа беше првата слика што ми излезе пред очи, дента кога првпат слушнав за проектот „Плетени коцки“ на групата граѓани, кои сплотени заедно дејствуваат во хуманитарни цели.

Овие Македонки плетеа во текот на минатите зими за да направат облека и да им помогнат на социјално загрозените групи, плетеа октоподи наменети за предвреме родените деца, а сега плетат коцки од кои се прават преубави ќебенца наменети за децата без родители.

Секоја членка плете коцки со димензии од 20×20 центиметри, а потоа од нив се создава големо шарено ќебенце. Кој не знае да сплете цело ќебе, може само да плете коцки, кои ќе бидат дел од ќебињата.

Идејата произлегува од проект наречен „Knit a Square“ со кој им се помага на дечиња од Јужна Африка, а кај нас им се помага на дечиња кои, за жал, растат без родителска грижа.

„Се плетат ќебенца наменети за Јавната установа за доенчиња и мали деца во Битола, а доколку има повеќе од потребното, тие ќе се распределат и на децата во други домови и установи“ – ми појаснија Гога и Александра, двете организаторки на проектот.

Бев премногу возбудена дента кога првпат отидов на состанок во едно скопско кафуле, каде се собраа членките од групата со цел да покажат што сработиле во изминатиот период.

Пред мене гледав стотици коцки, сплетени со многу љубов и грижа. Ќебенца кои мирисаа на омекнувач, меки и топли.

Везени со детски животни, цвеќиња или најразлични плетки изработени со една и две игли.

Секоја жена има своја приказна, зошто одлучила да се вклучи, а средбата беше прекрасно едночасовно дружење во кое се собираа и се распределуваа собраните донации во форма на волници, игли и материјали.

Кој не може да плете, добредојден е да помогне со донирање волници и игли кои веднаш се распределуваат на жените кои сакаат да плетат, а освен од Скопје имаше и неколку членки од другите градови на Македонија.

На тој начин, секој од нас може да помогне за да стопли нечиј живот, да му даде топлина и љубов на некое детенце, кое ќе знае дека под ќебенцето кое некоја жена го сплела со многу љубов, секогаш ќе може да најде заштита и утеха.

Ми се допадна целата идеја, па и јас почнав полека да плетам едно ќебенце, на кое верувам дека ќе се посветам во слободното време што ќе го имам во наредните неколку месеци.

Зошто? Затоа што секое дете заслужува да има љубов и топлина, но и безбедно ќебенце под кое ќе се стутка во моментите на несигурност и страв.

Затоа што секое дете заслужува љубов, а ние мајките најдобро знаеме дека подарената љубов никогаш не се дели, туку со множи со бројот на срцата на коишто им ја даваме.

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело / фото: Б. С. Б.