Славчо Попоски, метеоролог: „Ќе има постуден воздушен бран, со врнежи од дожд и снег на планините“

Детали

понеделник, 18 март 2024

„Кон крајот на денов, а особено во текот на ноќта, облачноста ќе се зголемува, и утре ќе има повремени локални врнежи од дожд, додека на планините ќе има повремени врнежи од снег“, вели метеорологот Славчо Попоски.

Додека дневните температури на воздухот ќе бидат во пораст, периодов утрата ќе бидат постудени, а можно е да има и услови за снег на повисоките места.

Во продолжение, прогнозата на метеорологот Славчо Попоски:

„Кон крајот на денов, а особено во текот на ноќта, облачноста ќе се зголемува, и утре ќе има повремени локални врнежи од дожд, додека на планините ќе има повремени врнежи од снег.

Во текот на утрешниот ден ќе започне да дува засилен ветер од северен правец, со што од север ќе започне спуштање на постудена воздушна маса.

Повремено ветерот ќе достигнува брзина од над 60 км/час, особено долж Повардарието.

Ветерот ќе продолжи и во текот на ноќта кон среда, кога ќе започне и разведрување и повлекување на облачноста во Македонија.

Токму поради разведрувањето и стабилизирањето на времето, во среда и во четврток на повеќе места низ Македонија се очекува појава на утрински мраз, кој секако особено лошо ќе влијае врз веќе расцветаните овошки.

Температурите во среда и во четврток во утринските часови ќе се спуштаат во интервалот од -5 до 3 степени, а на високите планински места тие ќе се спуштат дури и под -5 степени Целзиусови.

Сепак, максималните дневни температури на воздухот ќе бидат во пораст и ќе се искачуваат во интервалот од 11 до 18 степени, а најсвежо преку ден ќе биде утре, кога максималните дневни температури ќе се искачуваат во интервалот помеѓу 7 и 14 степени Целзиусови.

Во Скопје и околината ќе имаме слично време, со повремен локален дожд во текот на утрешниот ден и со засилен ветер од северен правец“.

Спирова С. | Црнобело

фото: freepik.com, Фејсбук