Денес се слави Свети Јован Златоуст – што треба да направите?

Детали

недела, 26 ноември 2023

Свети Јован Златоуст бил еден од најучените свештеници, па се верува дека денес е убаво да земете некоја книга и да прочитате барем еден мал дел во негова чест. Именден слават Јован, Јованка, Ване...

Православните христијани на денешен ден (26.11) го слават Свети Јован Златоуст. Именден слават Јован, Јованка, Ване...

Свети Јован Златоуст бил роден во Антиохија од татко Секунд и мајка Антуса. Изучувајќи ја грчката филозофија, светецот се згрозил од грчкото незнабожништво и одлучил да ја прифати христијанската вера и религија.

Прекарот Златоуст го добил заради своите реторички способности. Во 397-ма година бил избран за цариградски епископ и шест години мудро управувал со црквата со неспоредлива ревност и мудрост.

Ја разобличил царицата Евдоксија и влегол во конфликт со неа затоа што проповедал целосна реформа на животот, како во црквата, така и на царскиот двор.

Испратил мисионери кај незнабожечките Келти и Скити, ја сотрел симонијата во Црквата, односно купувањето и продажбата на свети работи и црковни положби, симнал многу епископи-симонисти и ја раширил милосрдната дејност на црквата.

Тој напишал посебен чин на светата литургија, ги посрамил еретиците, го протолкувал Светото писмо и ѝ оставил на Црквата многу драгоцени книги од своите беседи.

Бил симнат од престолот во 402-ра година, а царицата Евдоксија, го прогонувала двапати. Живеел во местото Коман во Ерменија, каде починал во 407-ма година.

Со оглед на тоа што Свети Јован Златоуст во својот живот оставил голем број книжевни дела, се смета дека тој бил еден од најучените свештеници, па многумина веруваат дека во негова чест, денес е убаво да земете и да прочитате макар еден дел од некоја книга.

Б. С. Б. | Црнобело