Јелена Карлеуша за CRNOBELO: „Еден ден ќе станам светска ѕвезда“

Со години ве следи епитетот „мала од скандала“... Чудно ли ви е кога во медиумите ќе напишат нешто убаво за вас, а не скандалозно?

Јас веќе и не знам што ново скандалозно може да се напише за мене.

Понекогаш имам чувство дека и кога дишам од тоа ќе произлезе некаков скандал. Ама, таква ми е изгледа кармата.

Тоа што на луѓето им е скандалозно, мене не ми е. Тоа е мојот живот, за жал, ха, ха - тоа сум јас.

Би сакала да можам да се вклопам во некакви стереотипи и да ме сакаат сите, ама ете, не ми оди од рака.

Кој е најдобриот совет што го добивте од вашата мајка Дивна, а кој сега им го пренесувате на ќерките?

Јас многу млада почнав да се занимавам со оваа работа, на неполни 16 години, колку што сега имаат моите Атина и Ника.

И многу патев, бев бурна, емотивна, агресивна, гласна - сè она што мојата Дивна не беше.

Таа си роди ќерка која е нејзина дијаметрална спротивност.

Сè влијаеше на мене, ме погаѓаше - нападите, неправдата, грдите зборови, а неа ја болеше што јас во комуникацијата со мажите, со медиумите, со луѓето генерално, немам среќа, па постојано плачам.

Реченицата што ми ја кажуваше, а која јас сега им ја кажувам на моите ќерки, е всушност една голема мудрост.

Ми велеше: „Сине, никој не е вреден за да пролееш макар и една солза на него“. И јас сега им го кажувам тоа на Ника и Атина.

Всушност, кога ќе помине сè, сфаќаш дека никој не бил вреден да плачеш по него, навистина.

Мојата мајка беше прекрасна жена, и таа зад себе остави многу, но сега сето тоа е заклучено во куќата во којашто живееше и сето материјално што го стекнала, едноставно седи таму.

Јас по нејзиното заминување само ја заклучив куќата и никогаш повеќе не стапнав во неа.

Ника има многу следбеници на ТикТок и одлични видеа, многу е забавна и опуштена... Следите ли што објавува и што мислите за нејзината ТикТок кариера?

Јас сум дупли Лав во хороскоп, и ние сакаме да ги почнуваме речениците со „јас“ и да бидеме во центарот на вниманието.

Ајде да се пофалам малку себеси дека се потрудив толку убаво да ги воспитам Ника и Атина, што воопшто не се грижам што ќе снима Ника, воопшто не ѝ се мешам и не ги гледам нејзините видеа.

Јас следам на ТикТок, ама не отворам, освен ако не ми кажат пријателите да видам нешто или ако не споделат нешто медиумите.

Таа е скромно, убаво воспитано девојче и главно во видеата подготвува салата од краставици и зборува колку ѝ е тежок животот затоа што дента има 7-8 часови и си зборува за некои нејзини детски теми и тоа ми е многу слатко.

Јас само на почетокот ѝ кажав дека никогаш не смее да одговора со погрдни зборови, без оглед што ќе ѝ напише некој за неа, за нејзината мајка, за некој од нашето семејство, зашто на социјалните мрежи има сè и сешто.

Може да одговори, ама не смее да користи грди и навредливи зборови.

Интересно е како мојата ќерка знае да му одговори со најубави зборови и на тој што пишува грди работи и да го стави на свое место.

Кога ќе згаснат камерите, зад затворени врати, каква е Јелена приватно? Може ли некој да ве види дома како седите по тренерки, јадете пуканки и гледате опуштено серија, на пример?

Мојот живот е еден голем парадокс. Јас сум „вонземјанин“ на сцената, а најнормална личност вон неа.

Јас не излегувам никогаш никаде, само седам дома, и тоа по тренерки.

Имам многу животни, дури 9 и вдомувам животни кои луѓето ги повредиле и отфрлиле. Се занимавам и со хуманитарна работа.

А кога не работам, не сакам хаос, гужви и луѓе.

Се дружам со многу мал број луѓе и опкружена сум со животните, тоа е мојот живот кога не сум на сцената.

Со кој македонски музичар би сакале да снимите дует?

Желба ми беше да снимам песна со Тоше, но тоа, за жал, никогаш не се оствари.

А која ви е омилена македонска песна?

Не можам да издвојам ниедна. Вие имате толку богата ризница на песни, особено стари народни, што секоја од тие песни ми се допаѓа и ја слушам со задоволство.

Ја обожавам македонската традиционална музика.

После 30 години кариера, има ли нешто што посакувате да си го исполните и да си речете сама на себе: „Тоа е тоа Јелена, го достигна врвот...“?

Имам само една неостварена желба. И бидејќи сум скромна личност, навистина сум скромна, ќе кажам дека тоа е да станам светска ѕвезда.

Верувам во тоа, верувам дека ќе се случи еден ден.

А има уште еден проблем - јас никогаш не се откажувам, го немам тоа во својот генетски код.

Можеби тоа е и причината што траам толку долго и чекам да ми се оствари тој сон.

Еве, ветувам, ќе се пензионирам кога ќе станам светска ѕвезда, ха, ха, ха.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело