Благица Зикова, мајката на штипската четворка: „Трошиме по 25 пелени на ден, бебињата се мирни и спијат по цела ноќ“

Почнаа ли да им растат првите запчиња? Како ги поминувате настинките? Дали ако едно се разболи, ќе се разболат сите?

Запчиња сè уште немаме, но почнавме да се лигавиме и да ставаме играчки во уста.

Што се однесува до настинките, Ведран се разболе во јануари и завршивме во болница. По 9 дена „ги фати“ и Леонтина и Михаил, но за среќа Теодор немаше ништо.

Оттогаш се немаме разболено, се надевам дека така ќе биде и понатаму.

Колку пелени менувате дневно? А, колку пари трошите на пелени месечно?

Пелени 5-6 на дете, зависи, но вкупно околу 25 пелени на ден.

Во првите два месеца трошевме по околу 6.000-7.000 денари месечно за пелени, но потоа многу фирми ни подарија пелени, а најмногу ни подари „Алкалоид“ - пелени, кремови, влажни марамчиња, шампони и слично.

Што ви е најголем трошок месечно, освен пелените?

Моментално најголем трошок ни е млекото.

Дали почнуваат да го покажуваат својот карактер? Колку се разликуваат едно од друго? Кое бебе е најтемпераментно, а кое најмирно?

Тие се бебиња и од ден на ден се менуваат. Не можеш да кажеш кој каков карактер ќе има, но многу е важно дека имаат навики, па кога им се ближи времето за млеко или за спиење, знаат да бидат и малку „кенкави“.

Теодор и Леонтина се мирни, иако пред да си дојдат дома Леонтина беше најнемирна, а Теодор беше спанко.

Ведран и Михаил се темпераментни и многу брзо се лутат. Пред да си ги земеме од болница Михаил беше најмирен, а Ведран си остана ист и додека бевме во болница и откога сме дома - лутко и темпераментен.

Плачат ли многу ноќе? Дали плачот на едното, секогаш значи дека ќе заплаче барем уште едно?

Ноќе не плачат. Си спијат убаво цела ноќ. Во 21:00 часот сме во кревет, потоа во 23:00 часот пиеме млекце и спиеме до 06:00 часот наутро.

Ретко се случува сите да плачат во исто време. Обично кога треба да пијат млеко или да спијат, тогаш може да се случи да плачат сите во глас.

Најчесто се случува да плачат двајца или само еден.

Планирате ли наскоро да ги запишете во градинка или уште е рано? 

Секако, како и сите деца, и тие ќе одат во градинка. За во градинка планираме, здравје, од март 2025.

Колку ви се смени животот во овие месеци? Што ви недостига најмногу? Имате ли барем малку време за себе, да поспиете и да се одморите, ако ништо друго?

Во моментот ништо не ми недостига, а до пред седум месеци ми недостигаше тоа што денес ме исполнува и прави среќна.

Животот без деца е непотполн - може да бидете среќни, но нема да бидете комплетни. Среќата без деца не е слатка како кога имаш дечиња.

Времето за себе заврши. Сега сум посветена на нив, а кога спијат преку ден ги завршувам останатите обврски.

Е, кога навечер ќе заспијат, тогаш си посветувам време за мене.

Која ви е (досега) најубавата работа поврзана со мајчинството?

Мајчинството е најважната и најубавата улога во животот, па не можам да одвојам која ми е најубава работа, бидејќи уживам во сè, се радувам на секое нивно движење или нешто ново што пробуваат да го направат.

Сега се трудиме да лазиме. Утрото е убаво кога се будат и влегувам во нивната соба им кажувам „Добро утро“, а тие ме чекаат со насмевка и радост.

Кога ќе ја видиш нивната среќа и радост во очите, на сè забораваш - небитни се заморот, болката и ненаспаноста.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело