Бродски љубовни приказни: Србинот Ненад и Перуанката Дафне, Карен од Мексико и Роман од Венецуела

Детали

понеделник, 01 јануари 2024

Врските на брод се познати по својот краток рок на траење, многу авантури за една ноќ, слатки, но супер кратки. Но, на сред море почнале и љубовни врски кои траат со години, па завршиле со брак и семејства. Можеби овие вистински љубовни приказни се ретки, но не и невозможни. Четири бродски љубовни приказни што се едни од ретките.

Бродските врски се вистински тест на љубовта, каде километрите се најголемиот непријател на романтиката, а довербата и трпението се клучот на успехот.

Но, за среќа, постојат приказни кои сведочат дека љубовта може да биде посилна и од брановите, и од километрите, да ги победи културните разлики и јазичните бариери, а и често да биде крунисана со брак.

Пет пара веќе ни раскажаа за сите предизвици со кои се соочиле и како ја граделе нивната врска, а сега прочитајте за уште четири интернационални парови од различни краеви на светот, на кои едно нешто им е заедничко - нивната љубов започнала сред море.

Перуанката Дафне ќе се пресели во Србија за својот сакан, иако не ги сака зимите, Бразилецот Велингтон својот дом го гради во Аргентина, а Јужна Африка е новиот дом каде својот син го растат Вирџинија и Крег.

Ненад и Дафне: Српско-перуанска љубов

Србинот Ненад Јовановиќ и Перуанката Дафне Јулиса овој јануари ќе ја прослават својата прва годишнина од брак, а заедно се од 2020 година. Се запознале на бродот MSC Virtuosa, каде и двајцата работеле како фотографи.

Во последниве три години се на релација брод-Србија-Перу, но следната година, Дафне официјално ќе се пресели во Ниш.

Ненад вели дека се соочиле со многу предизвици како интернационален пар кој својата врска ја започнал на брод, но, потенцира дека сè е можно кога се сака, па заедно успеале да се изборат со сите пречки и тешкотии.

„Дафне брзо и убаво се навикна на животот во Србија, воодушевена е од нашата храна, луѓето, културата, а најмногу од сè и се допаѓа што е безбедно. Единствена замерка и е климата, навистина не ѝ се допаѓа зимата“ – вели тој за својата сопругата и нејзината адаптација на српскиот живот.

Во однос на јазикот, таа е на почеток, разбира помалку, но постојано учи.

Тој поминал неколку месеци во Перу, да се запознае со културата на својата сакана. Заедно посетиле повеќе градови кои го воодушевиле - Лима, Куско, Тарапото, Арекипа …

„Од почетокот на врската одлучивме дека тоа нема да биде врска на далечина. Па затоа кога не сме на брод живееме заедно, или во Србија или во Перу“ – појаснува тој и вели дека по завршувањето на следниот бродски договор, во Србија ќе го градат својот дом.

А, за врските на брод, тој вели дека за да успеат потребно е само разбирање и меѓусебна поддршка и, секако, доверба која е клучот на љубовта, а и многу трпение за чекање по аеродроми и долги летови.

Љубов меѓу вечните ривали: Бразил и Аргентина

Јулиа Кеико Меторума и Велингтон Родригез да Силва се доказ дека постои љубов меѓу вечните ривали, Аргентина и Бразил.

И двајцата работат како фотографи за бродска компанија и имаат по 32 години, а за својот дом го одбраа Росарио, родниот град на Кеико, Аргентинка со јапонски корени.

Овој месец слават петгодишнина, а се запознале на брод каде Кеико работела како фотограф, а Велингтон како келнер во ресторан. Заедничка пријателка е „виновна“ за нивната љубов.

„По завршувањето на нашиот прв договор заедно, тој дојде да ме посети во Аргентина и оттогаш го градиме нашиот живот тука“ – раскажува Кеико.

Таа појаснува дека понекогаш е тешко да се биде во врска со партнер од друга држава, но, за разлика од нивните колеги од брод, тие двајца имаат среќа што нивните држави се соседи, а тоа е олеснителна околност, посебно кога станува збор за документи.

Тоа што и двајцата работат заедно на брод, за неа е навистина позитивно, бидејќи полесно е да се издржи животот како член на екипаж заедно со личноста што ја сакаш, посебно во тешките и стресни моменти.

Кеико објаснува дека заедно одлучиле Аргентина да биде нивен постојан дом.

„Решивме Велингтон да се пресели во Аргентина најмногу поради моето семејство, бидејќи сме само јас, мајка ми и моето куче. А, и на нему многу му се допаѓа мојата држава.

Секако, на почетокот беше тешко поради јазикот бидејќи зборуваше многу малку, но секој ден стануваше сè подобар и подобар, и сега и двајцата можеме да кажеме дека Аргентина е наш дом“ - вели таа.

Познато е дека врски на брод се кратки, но на прашањето која е тајната на нивната успешна љубовна приказна, Кеико вели дека нема тајна, едноставно, имале среќа што се пронашле еден со друг, имаат ист животен стил и планови, а пред сè, и двајцата се подготвени да се борат за нивната врска.

„Би продолжиле да работиме на брод уште неколку години за да си овозможиме добра заработка и заштеда, а во иднина би сакале да го градиме нашето семејство во странство, најверојатно во Јапонија“ – ги открива таа нивните планови.

А кога се разделени, секој во својот град, таа вели дека времето го поминува со своите пријатели, читање книги, вежбање и, секако, постојан контакт со нејзиниот сакан.

Уште две бродски приказни на следната страница...