Стефан од Скопје е фитнес тренер на Тајланд: „Ова е рајот на земјата, но ми фали да сум поблиску до дома“
Има ли во Тајланд дружење како кај нас, пријатели со кои можеш во секое време да излезеш?
Да секако, особено на островот каде што живеам јас има голема фитнес заедница, па многу лесно можеш да запознаеш луѓе кои вежбаат, други фитнес тренери и фитнес ентузијасти.
Јас лично, скоро сите пријатели што ги имам овде, ги имам запознаено преку фитнесот и спортот.
Генерално е многу лесно за запознавање луѓе и за дружба, бидејќи на островот владее многу опуштена атмосфера и сите се пријателски настроени и сакаат да се дружат.
Треба ли да се придржуваш до некои локални обичаи/закони кои важат за сите, без оглед дали се туристи или живеат таму?
Па да, како и во секоја земја треба да се почитуваат локалните обичаи и нивниот начин на живот.
Тајланд е будистичка земја и, нормално, си имаат посебна култура и обичаи што јас и сите други странци овде треба да ги почитуваме.
Какви се локалците?
Според мене тие се едни од најљубезните и најгостопримливи луѓе во светот.
Секогаш се спремни да помогнат и да те поздрават со насмевка, најважно од сè е што прифаќаат странци и не ги третираат со непочитување како што е тоа случај во многу земји каде што досега сум бил.
А каква е локалната храна? Кој е најпознатиот специјалитет? Дали ти е по вкус или не го jадеш?
Локална храна според многумина е една од најдобрите во светот, меѓутоа јас, искрено, не сум голем фан, па си се држам до европската храна.
Локалната храна е премногу лута, најчесто се состои од оризови нудли и ориз.
Најпознат специјалитет е Пад Таи, нудли од ориз, што според мене не е воопшто лошо.
Мое омилено тајландско јадење е Пад Си Иу, односно нудли во соја сос со пилешко.
Дали ти дошле гости од Македонија и ако да, каде ги шеташ?
Да, досега повеќепати сум имал гости од Македонија и сите се одушевени од убавината на островот.
Ги шетам по моите омилени места, најчесто плажи, кафулиња со поглед на океанот, будистички храмови и слично.
Има премногу убави места и секогаш ми е тежок изборот што попрво да им покажам.
Како го поминуваш слободното време? Што ти е хоби?
Во слободно време вежбам, трчам на плажа, излегувам со пријателите на јадење или на кафе, обично моето слободно време се врти околу спортот и вежбањето.
Ти недостига ли Македонија? Колку често се враќаш дома?
Секако дека да, сите мои пријатели и моето семејство се таму.
Досега се имам двапати вратено на одмор и би сакал да одам дома што почесто, бидејќи иако тука е рајот и е преубаво место за живеење, нема никаде како дома.
Што македонско најмногу ти недостига кога не си тука?
Да бидам искрен, највеке ми фалат бурек и јогурт, овде ги нема. Се шегувам.
Највеќе ми недостигаат моите пријатели и семејството, дружбата и слободата што ја имам кога сум дома.
©CRNOBELO.com Забрането преземање и копирање. Крадењето на авторски текстови е казниво со закон.
А. Ј. | Црнобело
Би можело да ве интересира:
![](https://www.crnobelo.com/media/com_jvrelatives/images/thumbs/com_content_107489_400.jpg)
![](https://www.crnobelo.com/media/com_jvrelatives/images/thumbs/com_content_111507_400.jpg)
![](https://www.crnobelo.com/media/com_jvrelatives/images/thumbs/com_content_105257_400.jpg)
![](https://www.crnobelo.com/media/com_jvrelatives/images/thumbs/com_content_104677_400.jpg)
![](https://www.crnobelo.com/media/com_jvrelatives/images/thumbs/com_content_106060_400.jpg)
![](https://www.crnobelo.com/media/com_jvrelatives/images/thumbs/com_content_105988_400.jpg)