7 работи кои мора да ги имате предвид пред да купите нов мебел

Не заборавајте да го измерите просторот и однапред да размислите во каков стил сакате да ја уредите просторијата пред да го купите мебелот.

Купувањето нов мебел може да биде вистински предизвик и воопшто не е лесно да ги најдете совршените елементи за вашиот дом. Но, со малку планирање однапред лесно ќе ги избегнете грешките и ќе го направите вистинскиот избор.

Кои работи мора да ги земете предвид пред да купите нов мебел?

Измерете ја просторијата

Не заборавајте внимателно да ја измерите просторијата за којашто купувате мебел. Притоа измерете го и просторот каде што планирате да стои секое парче мебел за приближно да знаете колку простор ќе ви зафати.

Некогаш и само еден сантиметар може да ви направи голема разлика, што значи мерењето е клучно.

Обрнете внимание на стилот на просторијата

Пред да купите мебел, размислете во каков стил планирате да ја уредите просторијата.

Немојте да купите гарнитура само затоа што ви е убава во продавница, за кога ќе ја ставите во дневната воопшто да не се вклопува со ѕидовите, подот и слично.

Имајте на ум дека ако ѕидовите имаат тапети или впечатлива боја, подобро ќе биде да одберете мебел со понеутрална боја. Ако ѕидовите се бели, можете да ја освежите просторијата со мебел со поживи бои.

Нацртајте го распоредот на мебелот

Не треба да сте архитект за самите да си направите скица за распоредот на мебелот.

Оваа скица ќе ви помогне да одредите дали некое парче мебел ќе се вклопи во просторот уште пред да го купите.

Гледајте го мебелот како инвестиција

Добро би било да дадете и некој денар повеќе за поквалитетен мебел бидејќи сигурно ќе сакате да ви трае многу години. 

Исто така, размислете за условите во вашиот дом пред да купите што било.

Ако, на пример, имате мачка, имајте на ум дека кожената гарнитура не е најдобар избор бидејќи може да ја изгребе. Ако, пак, имате мали деца, имајте на ум дека сосема возможно е да истурат нешто на тепихот или гарнитурата, па подобро избегнувајте бели теписи.

Не заборавајте на удобноста

Кога станува збор за гарнитура, кревети и столчиња, удобноста сепак треба да биде најважна.

Па, немојте да купите стол или фотелја само затоа што изгледаат убаво, за потоа да не сакате да седнете на нив.

Не купувајте сè одеднаш

Нема потреба одеднаш да го купите целиот мебел и сите декорации во домот.

Најпрво купете ги големите елементи, па потоа полесно ќе воочите кои декорации, украси и слично ќе изгледаат најдобро во просторијата.

Впечатливите бои и дезени оставете ги за ситните детали

Наместо да купите шарена гарнитура, подобро е да купите еднобојна, па на неа да ставите шарени прекривки или перници. Следете го ова правило за сите поголеми парчиња мебел.

На овој начин ќе имате повеќе простор за менување ако некогаш посакате да ја смените бојата на ѕидовите, бојата на тепихот или слично.

Спирова С. | Црнобело