5 собни билки кои го разладуваат домот во тек на летото

Новото годишно време е на прагот, а со него пристигнуваат и неизбежните високи температури и летни горештини. Но, сте знаеле ли дека одредени растенија имаат моќ да ја намалат топлината, а зголемат влажноста во вашиот животен простор?

Во текот на летото, секој извор на свежина ни е добредојден, особено во домот, кој треба да биде пријатно и опуштено прибежиште од сончевите зраци.

Ако сакате дополнително да ја намалите температурата во внатрешноста од куќата или станот, корисно е да знаете дека постојат соодветни растенија кои се идеални за микроклимата во животниот амбиент.

Покрај тоа што создаваат удобна атмосфера, тие ја стабилизираат влажноста на воздухот и ослободуваат кислород, а впиваат штетните материи.

Ова се петте билки кои го разладуваат домот во текот на летото:

1. Алое вера

Алое верата е дефинитивно една од најкорисните и освежувачки билки кои може да ги имате во станбениот простор. Таа не само што ја одржува внатрешната температура, туку и ги отстранува штетните состојки од воздухот. Покрај тоа, веројатно веќе сте запознаени и со многубројните здравствени предности на ова чудесно растение.

2. Арека палма

Ако сте во потрага по најдобрата собна билка, оваа палма би требало да биде вашиот вистински избор. Арека палмата е природен навлажнувач, што вашиот дом го одржува свеж и ладен. Притоа, таа не е воопшто тешка за одржување и одгледување во затворен простор, а мошне отпорна е на причинителите на болести. Позната е како одличен пречистувач на воздухот, наоѓајќи се на самиот врв од билките во тој поглед.

3. Сансеверија

Сансеверијата е единствена, како по изгледот, така и по своите полезни својства. Кај нас е позната под називот „свекрвин јазик“, а во светот и како „индијанско перо“ и „змија-билка“, поради специфичните шари и занимливиот облик. Успева на слабо осветлени и светли места, а отпорна е на прашина и на загаден воздух. И не само тоа – оваа билка ги апсорбира токсичните елементи и неутрализира штетните гасови, а задржува влагата во домот.

4. Фикус

Фикусот е едно од најпопуларните собни растенија. Покрај температурата, фикусот ја смалува и загаденоста во просторот за живеење. Ова зелена билка го навлажнува и збогатува воздухот со кислород, ја апсорбира топлината, ги неутрализира токсините, а со помош на широките листови ја задржува и прашината во собата. Одржувањето е прилично едноставно, бидејќи е издржлив на сончева светлина и умерени количини на вода.

5. Папрат

И домашниот папрат важи за еден од најдобрите навлажнувачи на ентериерот. Добро успева и во простории каде што нема многу природно светло, ја сака влагата, а не бара претерана нега. Оваа билка го прочистува воздухот, неутрализирајќи ги штетните ефекти на токсините. Покрај чистењето и освежувањето на амбиентот, исто така ја контролира и топлината во животниот простор.

М. А. | Црнобело