Нагазивте на морски еж? Детално упатство за прва помош

Имајте предвид дека најдобро е боцките да ги отстрани медицинско лице, затоа што може да останат мали делови што тешко се вадат, а болката трае додека не се извадат сите остатоци од средбата со морското животно. Колку е опасен убодот од морски еж и како да го избегнете?

Морските ежови се животни што најчесто се застапени во топлите и чисти мориња, во плитките делови и крајбрежјата, а најчесто ги има под карпите и под нив.

Честопати може да се случи ненамерно да нагазите на ова морско животно на морското дно и да почувствувате силна болка.

Иако не може да предизвикаат посериозно нарушување на здравјето, болката предизвикана од боцките на морскиот еж не престанува сѐ додека не успеете да ги извадите сите боцки од вашето тело.

Дополнително, доколку останат делови може да почувствувате воспалителна реакција заради присуство на туѓо тело во организмот.

Болката се јавува како последица на отровот што го има во боцките на ежот, по што се јавува црвенило на кожата, но и отоци.  Самиот процес на вадење на боцките е болен процес, но истиот мора да се изврши темелно.

За да се заштитите од убоди на морски еж, на плажите каде тие се застапени, најдобро е редовно да носите чевли за вода, но доколку не сте биле доволно внимателни и сте нагазиле на ова морско животно, тогаш задолжително мора да се следи постапката за прва помош.

Имајте предвид дека најдобро е боцките да ги отстрани медицинско лице, затоа што може да останат мали делови што тешко се вадат, а додека не се извадат сите остатоци од средбата со морското животно ќе ви бидат потребни лекарства против болка и студени облоги.

Доколку морате сами да ги вадите боцките од ежот, тогаш следете ја следната постапка:

1. Исчистете го местото на убод со алкохол за да избегнете воспаление. Доколку немате алкохол, тогаш можете добро да го измиете со топла вода што ќе ви помогне полесно да ги извадите боцките;

2. На местото каде има боцки можете да ставите маслиново масло или бебешко масло (или масло за сончање) и со пинцета која претходно е дезинфицирана со алкохол боцките се вадат една по една;

3. Добро е да погледнете со лупа за да се осигурате дека сте ги извадиле сите боцки;

4. Доколку немате пинцета при рака, некои од боцките можете да ги извадите и со истиснување или пак со игла, но овој последниот начин, најдобро е да се избегнува, затоа што предизвикува дополнително оштетување на кожата;

5. Кога ќе се заврши со целосно вадење на боцките, местото на убод се дезинфицира со алкохол и се препорачува местото да се завитка со завој и неколку дена да избегнувате да газите со ногата.

Вообичаено болката трае околу два дена, но ако не поминува, тогаш се препорачува нозете да се ставаат во ладна вода.

Доколку сѐ уште има остатоци од боцки, најдобро е да посетите лекар.

Б. С. Б. | Црнобело