Влакна на грбот кај жени: Зошто се јавуваат и како е најдобро да ги отстраните?

Многу жени се соочуваат со несакани влакна на делови од телото како лице, стомак, па дури и грб. Влакната сами по себе не се опасни, но некогаш можат да бидат предизвикани од здравствени проблеми, како хормонална нерамнотежа.

Густите и темни влакна се нешто што го поврзуваме со машкото тело. И, генерално, мажите се повлакнести од жените, најмногу поради различното ниво на одредени хормони во нивното тело.

Но, и кај некои жени можат да се јават потемни влакна на невообичаени места како лицето, па и грбот, особено долниот дел.

Проблемот кај жените е што појавата на влакна на грбот може да има влијание врз самодовербата. Но, добрите вести се дека во повеќето случаи, можете да ги отстраните безбедно.

Причини за појава на влакна на грбот кај жените

Кај мажите, обично генетиката е таа што одредува дали ќе имаат повеќе влакна на грбот.

Одредени гени ги прават мажите почувствителни на ефектите на тестостеронот – машкиот хормон кој е одговорен за растот на влакната на телото.

Кај жените, оваа појава може да биде предизвикана од повеќе причини.

Најчестите причини за појава на влакна на грбот кај жените вклучуваат

• Хормонална нерамнотежа
• Кушингов синдром
• Проблеми со надбубрежната жлезда
• Синдром на полицистични јании
• Одредени лекови

Дали е безбедно да ги отстранете влакната на грбот?

Доколку ви сметаат, слободно можете да ги отстранете влакната на грбот.

За ова постојат неколку опции:

Бричење. Ова е безболен метод, но за најдобри резултати ќе треба да се бричите многу често. Покрај тоа, по бричењето може да ви се чини дека влакната растат потемни и подебели.

Кремови за отстранување влакна. Овие кремови се исто безболни, но имаат сличен ефект како бричењето. Односно, ќе треба да ги користите често. Покрај тоа, ако имате почувствителна кожа, може да се јави иритација.

Депилација. Ова е опција што ја одбираат многу жени. Депилацијата може да биде малку болна, но резултатите се подолготрајни. Покрај тоа, со редовно депилирање постои можност и да се намали растот на влакната.

Ласерска депилација. Донекаде, ласерската депилација е трајно решение. Но, имајте на ум дека во некои случаи влакната можат повторно да почнат да растат по неколку месеци или години. Исто така, ласерската депилација е најскапата опција.

Дали треба да се консултирате со лекар?

Влакната сами по себе не претставуваат опасност.

Но, доколку сте загрижени за вашето здравје, секогаш е добро да се консултирате со лекар.

Само тој може да утврди дали имате некаков проблем кој можеби е причина за појавата на влакна на грбот.

Спирова С. | Црнобело