11 грешки во спиењето кои ви го нарушуваат здравјето

Мноштво луѓе имаат проблеми со сонот, бидејќи практикуваат погрешни ритуали пред и после одењето во кревет.

Доколку и самите сте едни од нив, обидете се да ги избегнете лошите навики. За дел од нив, веројатно не ни претпоставувате дека би можеле да ви го нарушат сонот, но и здравјето. Сепак, тие се и тоа како штетни.

А, единаесетте грешки при спиењето кои ви го нарушуваат здравјето се:

1. Вештачко светло

Ако сте изложени на вештачка светлина додека сте во кревет, ќе ви биде потешко да спиете, поради прекинoт на производство на мелатонин во вашето тело. Мелатонинот е хормонот кој е одговорен за чувството на поспаност и сонливост. Затоа, изгаснете го светлото, навлечете ги дебелите завеси, или, пак, едноставно носете маска за спиење, како би спиеле во целосен мрак.

2. Алкохол

Иако ве прави забавени и поспани, алкохолот нема да ви помогне при спиењето. Дури и ако заспиете, ќе се разбудите повеќепати во текот на ноќта (веројатно со сува уста и мачнина), така што заборавете на алкохолот одредено време, доколку несоницата ве попречува во нормалното функционирање.

3. Кофеин

Зависниците од кофеин имаат генерално повеќе проблеми со спиењето, особено ако својот омилен пијалак го консумираат пред да си легнат. Шолјата кафе се задржува најмалку 6 часа во организмот, што исто така го намалува производството на веќе споменатиот хормон – мелатонин.

4. Спиење во тек на денот

Иако не е лоша сама по себе, дневната дремка може да резултира со немирен сон во текот на ноќта. Обидете се да отспиете од 20 до 90 минути дневно, доколку имате повеќе време.

5. Вежбање

После напорниот тренинг, сигурно чувствувате дека убаво би можеле да заспиете. Меѓутоа, дури и 30-минутна физичка активност непосредно пред спиењето, може да ви го наруши сонот. Вежбањето го крева нивото на енергија и ве подготвува за нови победи, ама не во креветот. За да немате потешкотии со спиењето, подобро е да вежбате наутро или попладне.

6. Топлина во собата

Кога не се чувствувате пријатно во својата спална соба, тоа секако влијае и на вашето спиење. А, високите температури предизвикуваат пореметувања во циклусот на спиење. Па, дури и ако успеете да заспиете, честопати ќе се будите. Ако ви е студено на стапалата, тогаш спијте со чорапи. Намалете го греењето и покријте се со полесно ќебенце.

7. Легнување во доцни часови

Ако рано си легнете, рано и ќе станете. Во спротивно, ќе ви биде потешко квалитетно и доволно да се наспиете. Особено после сите дразби од технолошките уреди што постојано ги користите. Накратко - исклучете го телевизорот, а лаптопот и мобилниот телефон оставете ги настрана во текот на ноќта. Наутро ќе одговорите на сите важни пораки и електронската пошта.

8. Бучава

Не е потребно некакво посебно објаснување. Само обидете се да ја намалите буката околу себе, а ако е неизбежна, како на пример сообраќајниот метеж, набавете си чепчиња за уши, кои се меки, па нема да ви пречат во текот на ноќта.

9. Мобилен телефон

Одново се враќаме на мобилниот телефон, кој за волја на вистината, ретки се луѓето што го испуштаат од рака пред спиењето. Некогаш, дури и по неколку часа. Меѓутоа, ако навистина сакате да си помогнете, исклучете ги сите звуци (освен алармот), нотификации, светла и слично на својот паметен уред. Тие влијаат на вашиот циркадиски ритам, кој е особено чувствителен во ова доба од годината.

10. Одложување на будилникот

Ако сте една од особите што ова везден го прави, тоа значи дека секое утро си ја пореметувате природно создадената точка на будење. Со одложување на алармот, па повторно будење на секои 5 до 10 минути, таа константно се менува, така што ви го нарушува сонот, но и отежнува станувањето секое утро.

11. Храна

Се разбира дека и тоа што го јадете пред спиење, исто така го одредува квалитетот на вашиот сон. Можете секако да вечерате, но не преблизу до мигот кога ќе појдете во кревет. Притоа, избегнувајте ја храната што содржи шеќер, бидејќи така ќе се активираат органите и варењето. Наместо тоа, каснете намирници богати со протеини за мирен сон.

М. А. | Црнобело