Зошто се појавуваат акни на грбот и како да ги исчистите?

Знаете ли дека честото носење ранец на грбот може да предизвика појава на акни кои често знаат да бидат болни? Како да спречите појава на акни на грбот и на што треба да внимавате за да спречите нивно ширење по целиот грб?

Вообичаено акните се појавуваат на секој дел од телото каде што има повеќе жлезди коишто лачат масти, како што се лицето, градите и грбот. На грбот често може да се појават црнки, мозолчиња и акни исполнети со гној што се нарекуваат цисти.

Зошто се појавуваат акни на овој дел од телото и како да се ослободите од нив?

Како настануваат акни на грбот?

Овие акни се појавуваат затоа што на грбот има голем број жлезди што лачат себум, односно масла кои служат како заштита на кожата.

Вообичаено тие се резултат на тоа што порите на кожата се затнуваат од природните масти на кожата (себум) кои се мешаат со мртви клетки, пот или нечистотии.

Често овие затнати пори може внатре да имаат бактерии или да се воспалат, па на тој начин се формираат акни.

Најчесто се појавуваат кај адолесценти, но не постои ограничување во однос на возраста и полот кај кои личности може да се појават.

Освен бактериите, чест предизвикувач на акните е и габичката маласезија, која предизвикува израстоци слични на акни.

Оваа габа добро се развива на влажна површина, па луѓето што често носат тесна облека, од материјали кои не дозволуваат кожата да дише, или ранци, најчесто се во поголем ризик да добијат акни предизвикани од неа.

Исто така, кај акните предизвикани од габични инфекции, користењето кремови со антибиотик на своја рака, само дополнително може да ја влоши ситуацијата.

Симптоми

Акните често може да се појават на рамената, во горниот дел од грбот или на торзото.

Често овие акни може да бидат болни и да се појават во кластери (по неколку акни на помала површина од кожата).

Исто така, може да се појави само еден вид акни, или пак да биде мешавина од црнки, мозолчиња, црвени акни и цистични акни.

Кога треба да одите на лекар?

Пред да почнете да користите каков било лек за акни, најдобро е да консултирате лекар или дерматолог, а некои од следниве симптоми треба да ви укажат на тоа дека треба веднаш да закажете преглед:

• Ако имате болни цистични акни;
• Ако имате мозолчиња што се многу воспалени;
• Ако имате покачена телесна температура, која може да биде знак на воспаление.

Најчести причини за појава на акни

Ако постојано имате проблеми со акни на грбот, тогаш многу е важно да утврдите која е причината за нивната појава и да направите промени во секојдневниот живот.

Се смета дека најчесто акните може да се јават кај луѓето:

• Кои имаат промени во нивото на хормоните, како кај адолесценти и бремени жени;
• Кои често носат тесна или спортска облека која предизвикува триење на испотената кожа или, пак, често носат ранец;
• Користат лекови со кортикостероиди;
• Редовно користат лосиони или кремови за тело што може да ги затнат порите на грбот;
• Се под стрес или страдаат од анксиозност, заради што се зголемува нивото на кортизол во нивниот организам, што предизвикува зголемено производство на себум;
• Не се пресоблекуваат со часови по физичките активности и потта која е заробена меѓу облеката и телото доведува до затнување на порите;
• Имаат наследни предиспозиции за појава на акни.

Како да ги спречите појавата на акни и нивното ширење?

- Најдобро е секогаш да носите лесна и широка облека за да избегнете триење и иритација. Тесните маици може да ја заробат потта и да предизвикаат нејзино триење;

- Ако имате проблем со акни, избегнувајте да носите ранци или спортска облека со облога на грбот;

- Туширајте се веднаш по секоја физичка активност и избегнувајте да лежите голи на нечист под кога вежбате;

- Избирајте благи средства за хигиена;

- Геловите со бензол пероксид може да помогнат во чистењето на акните, а најдобро е да оставите да дејствуваат околу 5 минути пред плакнење;

- Во никој случај не ги стискајте мозолчињата за да не си предизвикате инфекции и нивно ширење;

- Ако имате долга коса, мијте ја почесто и соберете ја во опавче за да не го допира грбот;

- Избегнувајте храна која може да предизвика акни кај некои луѓе, како бело тесто, тестенини, компири...

Б. С. Б. | Црнобело