Црвен фустан наместо црвен кармин: Како да изгледате попривлечно во машките очи?

Вкусовите се различни. Сепак, постојат одредени нешта со кои жените ќе им го свртат погледот на мнозинството припадници од посилниот пол. Што е тоа кое момците сакаат да го видат на девојките?

Одговорот го даде истражувањето на веб-страницата Zooks, откривајќи разлики помеѓу мажите и жените во перцепцијата на „убавото“.

Иако повеќето девојки мислат дека фраерот неизбежно ќе падне на црвениот кармин, во суштина на момците им е секогаш поатрактивен природниот изглед.

Дури 57 проценти од испитаниците одговориле дека не го преферираат црвениот кармин, додека 82 проценти изјавиле дека повеќе им се допаѓаат природната и распуштена коса, наспроти трендовските фризури или коњското опавче.

Како да изгледате попривлечно во машките очи? Ова се петте совети кои ќе ви бидат од полза:

Црвената е боја на љубовта. А, мажите ги сакаат боите на жените. Интензивните бои се визуелно и ментално стимулативни. Сепак, доколку сте решени да го привлечете со бојата на страста, подобро е да ја имате во гардеробата, одошто на усните.

Наместо жар црвен кармин, облечете нешто во оваа огнена нијанса за романтичниот состанок. Со изборот на црвен фустан – ќе оставите впечаток на смела и самоуверена жена. Тоа дејствува како моќен афродизијак за припадниците на посилниот пол.

Кога не се задоволни со нејзиниот облик или текстура, жените неретко ја врзуваат косата во репче. И тоа е сосема во ред. Од друга страна, на мажите повеќе им прави мерак кога е пуштена.

Не дека и коњското опавче не може да биде секси. Меѓутоа, лелеавата коса едноставно им буди мечта да ги провлечат прстите низ неа. Па, доколку целта ви е фраерот да падне на вашиот изглед, пуштете и ја косата слободно да паѓа.

Можеби девојките се чувствуваат посекси со појака шминка на лицето, ама дури 66 проценти од момците сметаат дека партнерката е поатрактивна кога не претерува со боите. Особено темните тонови.

Мнозинството мажи го претпочитаат природниот изглед на жените. Наместо драматични очи и интезивни усни, одлучете се за минимум шминка на лицето, плус кармин или сјај во боја на кожата.

Иако е врежано мислењето дека жената е најатрактивна кога ќе покаже што повеќе гола кожа, на мажите при првата средба ќе им биде попривлечна ако остави нешто и на имагинацијата. Тенка е границата помеѓу еротичното и вулгарното.

Наместо прекумерно изложување на физичките атрибути, играјте на картата на дозирана сензуалност. Добро е да се знае и дека на припадниците од посилниот пол, неодолово секси им е кога девојката наутро ќе се вовлече во нивната полузакопчана кошула. Така барем велат резултатите од споменатото истражување.

Скоцканиот изглед од глава до пети, којшто испраќа порака како да сте симнале од модна писта, по сѐ изгледа не проаѓа баш најдобро кај мажите. Според истражувањето на Zooks, ним сепак повеќе им се допаѓаат девојките во класична варијанта. Обичната маичка и фармерки се непогрешлив избор.

Истото правило важи и за накитот. Можеби вашата пријателка ќе се вљуби во штосното тиркизно ланче што го имате на себе, но на момците ќе им се чини како пренападно на првиот состанок. Ако се прашува посилниот пол, минималистичкиот накит е секогаш подобар избор.

М. А. | Црнобело