„Јас можам да направам сè!“ – 3-годишно момче го освои светот со неговите позитивни афирмации (видео)

Одвреме-навреме на сите ни е тешко да се справиме со предизвиците што ни ги приредува животот. Вo тие моменти, понекогаш не ни останува ништо друго освен да си кажеме неколку охрабрувачки зборови.

Токму поради тоа, мантрите и позитивните афирмации станаа алатка што ја користат многумина во тешките моменти.

Една мајка решила да му го пренесе ова знаење на нејзиното дете и дефинитивно го направила вистинскиот чекор.

Алиса е мајка на 3-годишниот Ајан која кон крајот на минатата година објавила видео од нејзиното дете. Видеото се прослави дури сега, а на него се гледа малиот Ајан како оди на училиште, а притоа си ги повторува неговите утрински афирмации. Одејќи, малото дете повторува:

„Јас сум паметен. Јас сум благословен. Јас можам да направам сè!“

Во описот на видеото Алиса вели дека му ја кажала оваа афирмација на Ајан на неговиот втор роденден.

„Се надевав дека ќе ја запомни, ќе ја разбере и ќе ја користи за мотивација кога и да му затреба. Па, ова утро ме шокира. Одеднаш почна да ја повторува, па веднаш го извадив телефонот. Ја заврши (со ентузијазам), штом стигнавме до нашата дестинација. Многу сум горда на личноста во која расте моето дете“, напишала мајката.

Деновиве видеото стана хит, а на објавата има над 5.000 коментари од восхитени луѓе.

Пред речиси две години, Алиса го снимала Ајан додека тој ги учи афирмациите, и го објавила видеото.

„Ова утро почнавме со позитивните афирмации на Ајан што ќе си ги повторува секој ден. Иако можеби сега не ги разбира зборовите, ќе порасне и ќе сфати што значат и колку се вистинити“, напишала Алиса.

Изгледа сите можеме да научиме нешто од Алиса и нејзиното дете. Кога се чувствувате лошо или сте соочени со голем предизвик, повторете си ги зборовите на малиот Ајан и верувајте дека и вие можете да направите сè.

Спирова С. | Црнобело