„Бебето ти е вештачко, лесно ти беше тебе со царски, себична си бидејќи не го доиш, каква мајка си ти?!“

Забременувањето оди во 2 екстреми, лесно како грав, како два и два, или што би рекле мои познанички – да погледне само во мојот правец ќе забременам. 

Другата страна на приказната не е толку едноставна и симпатична, затоа што вклучува стотици прегледи, испитувања, боцкања, хормони, толку многу шприцови и инјекции што ќе имате чувство дека вие сте одговорни за најголемиот дел од медицинскиот отпад во Македонија.

Покрај физичкиот аспект – подуено, изобличено тело кое нема да си го препознаеш во огледалото и задолжителниот вишок на килограми, психичкиот замор најчесто се занемарува бидејќи нели „ако сакаш дете ќе стиснеш заби, ќе го изодиш патот, нема да се пожалиш и нема да пуштиш ниту солза“, па така ќе ти се разјадува и срцето и душата, ќе ти се напластуваат емоции, а ти едноставно немаш право на поплака бидејќи во спротивно – не заслужуваш бебе. Аман ма доста, не биди плачка!

До неодамна мислев дека само жените кои се инволвирани во процесот на ин-витро оплодување се соочуваат со вакви подли зборови, меѓутоа и жените кои се породиле со царски рез не биле поштедени. Вклучително и жените што ги дојат или не ги дојат бебињата.

Се чини дека нашиот народ има коментар за сè, а тие коментари носат само една порака: осудувачка, потсмешлива, навредлива конотација која има за цел да ви ја уништи радоста со новороденчето и семејството.

Замислете, жените породени со царски рез не биле вистински мајки според нашиот експертски народ (експертите се инаку стари баби, незапрашани тетки и безделничарски сосетки).

Оваа врвна комисија одлучила дека мајката го одбрала „полесниот пат“ за да се породи, не сакала да истрпи ниту минутка болка, бидејќи ете, тетка Стојна кивнала само еднаш и бебето излегло, а ти жено во 2020 година не си подготвена да се жртвуваш за своето бебе?

Не знам кој ве подучил на вакви глупости и како сте дошле до овој заклучок, ама само помислете колку време ѝ е потребно на родилката да закрепне од природно породување, а колку од царски рез.

Колкави болки трпи после едното, а колкави болки после другото… какво е чувството да си под анестезија додека ти ги претураат органите и се молиш да преживееш и ти и бебето.

Царскиот рез е најчесто она неминовно прибежиште со цел да не се загрозат животот на мајката и детето, ама вие експертски утврдивте дека мајката е себична и не може да истрпи 5 минути болки?

Потоа имате поплаки и за доењето на бебето. Доколку мајката нема млеко, поминала бессони недели, па дури и месеци со цел да го нахрани бебето, а притоа за жал не успеала, станува тажна, бесна и исфрустрирана, бидејќи според вас „не се потрудила доволно, си ги чувала градите да не ја сменат формата, себична е!“

Како воопшто доаѓате до вакви подли, недостоинствени и плиткоумни заклучоци не знам и не сакам ниту да знам. Не сакам да сте ми пријателки, не сакам да сте ми во мојата близина, а верувам и многу други жени не го сакаат тоа.

Бидејќи вие немате трошка емпатија за човечкиот род, а потоа и за жените како припаднички на сопствениот – вие сте бездушни. Непромислени жени со вашите демагогии и проповеди за тоа кој како треба да се однесува во улогата на мајка.

За промена, погледнете си ги своите деца. Многу веројатно е дека сте ги воспитале во истиот дух какви што сте и вие – ограничени и осудувачки настроени. Од многуте анализи на туѓите животи не сте си го погледнале својот, а ни животот на вашите деца, оние „феномени“ нели кои се природно зачнати, природно родени и доени до третата година од животот.

Тоа не ве прави којзнае колкава мајка. Породете се природно уште 4 пати ако сакате и дојте ги исто толку. Залудно е, тоа не те прави мајка.

Ги нема тие солзи што ќе ја исплачат вашата некултура и безобзирност. „Себичните“ мајки ги имаат веќе излеано поради вашите неумесни, грди коментари.

Утре, тоа „вештачко“ бебе, тоа „лесно“ царско породување, и неможноста за доење на бебето и „грижата за изгледот на градите“ може да биде твоето дете.

Дали и нему ќе му ги залепиш овие етикети?

©CRNOBELO.com Забрането преземање и копирање. Крадењето на авторски текстови е казниво со закон.

Автор: (О)Милена | Црнобелo