„Отидов на патување со крузер за да се сончам и да уживам, зошто се вратив разочарана?“

„Очекував дека патувањето ќе го поминам во пливање во базен и сончање, а целиот престој на крузерот ми помина во чекање во редици и постојано имаше гужва“ – раскажува девојката која одлучи да ја сподели приказната за тоа како навистина изгледа патувањето со крузер.

Авторката Џои Хаден за Insider напиша статија во која преку фотографии прикажа како изгледало нејзиното прво патување со крузер на Ројал Карибиан.

Како што вели патувањето воопшто не ги исполнило нејзините очекувања, но тоа не значи дека на секое крстарење е таков случајот, станува збор за индивидуално искуство.

Во продолжение ви ја пренесуваме нејзината сторија во целост:

„Кога го резервирав патувањето со крузерот Wonder of the Seas на Ројал Карибиан очекував да уживам во извонредни погледи да се релаксирам во пливање и сончање. Но, моето прво искуство беше сосема поразлично од очекувањето.

Се сончав во бучна атмосфера, а околу базенот имаше толку голема гужва што едвај успевав да најдам столче, а сѐ друго гледав низ главите на присутните.

Се разочарав уште пред да се качам на крузерот. Со оглед на тоа што живеам во близина на градот од каде што тргнуваше крузерот, моето патување почна со кратко патување со авион и престој во хотелска соба во близина на пристаништето Fort Lauderdale во Флорида.

Кога пристигнав на аеродромот во Флорида, чекав 45 минути за хотелскиот превоз да ме земе. Ова беше првото од многуте патувања во преполни автобуси и сметам дека подобро ќе беше да си викнев такси.

Следниот ден, се качив во автобус во кој беше многу топло, заедно со други луѓе што резервирале патување на крузерот и се упатив кон пристаништето.

Не очекував дека ќе имам прекрасен поглед на пристаништето. Чекав долга редица за да влезам на терминалот на крузерот и сметам дека веќе требаше да ми биде јасно дека за време на патувањето многупати ќе чекам во долги редици.

Во терминалот на крузерот имаше уште една долга редица за да поминеме низ обезбедувањето. Додека чекав, се смеев читајќи ги знаците на кои пишуваше: „Оттука почнува авантурата.“

Кога се качив на бродот, бев возбудена што имав можност да го гледам океанот додека испловувавме, но погледот ми беше блокиран од висок, голем прозорец, до кој немаше место за да застанам.

Бродот беше толку голем што неколкупати се загубив за време на мојот престој. Сепак, од помош ми беа мапите поставени на секој кат од крузерот.

За време на мојот еднонеделен престој сфатив дека дури и најголемиот крузер во светот понекогаш може да биде преполн. Иако луѓето уживаа, голем дел од заедничките палуби ми наликуваа на преполни трговски центри.

Имаше гужва и долги редици каде и да одев, па дури и во бифето. Базените беа преполни, а исто така и просторот околу нив.

Иако има правило лежалките да не се резервираат со крпи, сите го правеа тоа, па беше вистински проблем да се најде место.

Ако чекав да дојде вечерта за да најдам место покрај базенот, почнуваше да дува ветер и беше премногу ладно за да уживам во базенот.

За големиот број на активности на бродот мораше да се чекаат долги редици.

На секое застанување на бродот, чекав редици за да поминеме низ обезбедувње при секое излегување и влегување во бродот. Иако ова ме нервираше, сепак се чувствував побезбедно.

Според она што го слушнав од персоналот, на бродот имало уште 5.000 други патници и сфаќам зошто изгледаше дека има толку многу гужва, па сметам дека ако резервирам патување на брод со помалку патници ќе си поминам подобро.

Дополнително, следниот пат мислам дека ќе резервирам патување надвор од сезона за да ги избегнам гужвите.“

Б. С. Б. | Црнобело