„Бев на еден ден во Валенсија - за 2 евра уживав во најубавиот поглед на градот, а не можев да се наситам од паеља“

Иако еден ден е кратко време, историскиот центар на Валенсија е прилично мал и до повеќето туристички атракции може да се стигне пеш. 

Сигурни сме дека ќе можете да имате комплетно искуство во градот и покрај фактот што имате само 24 часа да го направите тоа. 

Како да стигнете до Валенсија?

Најлесно е да одите од Скопје до Софија (Бугарија) со автобус, а од таму со директен лет до Валенсија.

Кога ќе слетате на аеродромот Манисес, кој се наоѓа на 10 километри од центарот, ги имате овие опции за да стигнете до центарот

Метро: Има две линии што ќе ве остават во центарот (Xàtiva или Colón). Патувањето е 20 минути за околу 5 евра.

Автобус: Автобус со број 150 ќе ве остави во центарот (Plaza del Ayuntamiento и Mercado Central), а патувањето трае околу половина час и чини 1,5 евра.

Такси: Цената е околу 20 или 25 евра, во зависност од локацијата.

Еден ден во Валенсија: Што сè да посетите?

Восхитувајте се на убавините на палатата Маркес де Дос Агуас (El Palacio del Marqués de Dos Aguas)

Без разлика дали ќе патувате со метро, автобус или такси, центарот на градот е плоштадот на градското собрание (Plaza del Ayuntamiento), а Xàtiva или Colón се исто така во околината, па од таму можете да продолжите кон палатата Маркес де Дос Агуас.

Освен импресивната фасада и нејзините архитектонски придонеси, палатата е седиште на Националниот музеј за керамика „Гонзалес Марти“, поради што нуди комплетна културна понуда за секој.

Плоштад Редонда (Plaza Redonda)

Потоа ви препорачуваме да ја следите рутата кон неверојатниот плоштад Редонда (Plaza Redonda), со 4 влеза и неколку продавници за сувенири, за кои сме сигурни дека ќе ве остават без зборови.

Исто така во зависност од денот и сезоната, можете да видите и некои традиционални работилници во кои можете да се вклучите.

Пробајте паеља и орчата

Напуштајќи го плоштадот, можете да побарате и место каде што ќе пробате паеља или орчата.

Паељата е толку позната што можете да ја пробате низ целата земја, па дури можете да видите верзии во други земји. Се подготвува со ориз, пилешко, зеленчук, шафран, иако рецептот може да варира во зависност од областа. Можете да одберете само со зеленчук или пак морски плодови, но во Валенсија традиционалната паеља се прави со пилешко и зеленчук.

Интересен факт: Во Мадрид во 2001 година, тимот од Валенсија наречен Galbis Paellas Gigantes ја направи најголемата паеља во светот. На фотографијата подолу паељата е направена од член на тој тим, а ние ја имавме честа да ја пробаме!

После вкусниот ручек, пробајте орчата за која се вели дека било пијалак на фараоните. Според локалните жители, најдобрата орчата ќе ја најдете во Horchateria de Santa Catalina.

Уживајте во погледот кон Валенсија од кулата Ел Мигелете (Torre El Miguelete)

Од таму ви препорачуваме да се искачите на 207-те скалила на кулата Мигелете за да уживате во најдобриот поглед кон Валенсија. Цена на влезот е 2 евра.

Прошетајте низ населбата Кармен за да ги видите убавите графити и познатата куќичка за мачки.

Најубавата и алтернативна населба на Валенсија е населбата Кармен, која всушност е автентичниот историски центар на градот.

Продолжува на следната страна...