Жртвувал луѓе за ритуали, правел магии за нарко-босови - бизарниот култ на Адолфо Констанцо

Адолфо Констанцо имал свој култ со кој практикувал ритуали со човечки коски, а го привлече вниманието на јавноста кога уби американски студент бидејќи сакал да направи ритуал со неговиот мозок - што друго знаеме за озлогласениот убиец од САД?

Адолфо Констанцо пораснал во Мајами, Флорида, а кога сè уште бил тинејџер, се вклучил во трговија со дрога и неколку чудни култови поврзани со религија.

Работел како чирак на волшебник и ја практикувал религијата наречена Пало Мајомбе, која има ритуал познат како nganga.

Овој ритуал вклучува ставање човечки и животински коски во железен котел, како и жртвена животинска крв, за да се направи некоја „магија“.

Кога Констанцо се преселил во Мексико Сити во 1984 година, тој почнал да нуди ритуали со магии на градската елита и бројните нарко-картели.

Тој ги извршувал овие ритуали со животни, многу од нив егзотични, како и со човечки коски што ги крадел од гробовите.

Адолфо, заедно со големиот број следбеници што ги стекнал за време на неговиот живот таму, почнал да мисли дека ритуалот nganga ќе биде помоќен ако почнат да користат живи човечки жртви, а не коски украдени од гробишта.

Освен овие ритуали, Констанцо се вклучил и во бизнисот со дрога, работејќи со картелот на браќата Хернандез.

Во 1988 година, Констанцо се преселил на ранч во Санта Елена, каде што собирал човечки жртви и складирал големи количини дрога.

На ранчот, Констанцо ги криел телата на жртвите користени за неговите ритуали. Тој верувал дека колку е поголема жртвата, толку е поголема моќта на котелот, а со тоа и магијата.

Иако култот веќе имал човечки жртви, Констанцо одлучил дека им треба и мозок од американски студент за да ја зголемат силата на магијата.

Убиството на Марк Килрој

Убиството на Марк Килрој е најозлогласеното убиство што го извршил култот. Марк Килрој бил американски студент по медицина на Универзитетот во Тексас.

Тој заминал во Мексико на пролетниот распуст во 1989 година со тројца негови пријатели.

Тие го оставиле својот автомобил на американската страна од границата и ја поминале границата.

Пријателите уживале низ градот и баровите, а потоа решиле да се вратат до нивниот автомобил. Но, Килрој никогаш не се појавил.

Тој бил киднапиран од култот и однесен на нивниот ранч каде што бил ужасно мачен.

Тие ги искористиле неговите мозок и 'рбетот за дел од ритуалите, а неговото тело потоа било распарчено и закопано на ранчот.

Имало малку докази за тоа каде отишол Килрој и што се случило, сè додека член на култот не се предал и ја одвел полицијата на ранчот.

Кога полицијата истражувала за дрогата на имотот, еден од работниците спомнал дека видел белец врзан во камион.

Полицијата нашла 27 осакатени тела закопани во близина на ранчот, вклучувајќи го и телото на Килрој. Откако сите докази биле отстранети од местото на злосторството, полицијата го запалила ранчот.

Адолфо Констанцо не сакал да оди во затвор, па додека полицијата да стигне во неговиот стан каде што се криел со другите соработници, Адолфо му го предал пиштолот на еден од нив и му рекол да го застрела.

Тој починал истиот ден, во 1989 година.

M. Г. | Црнобело