Кој ги плаќа и што се случува со фустаните што ги носат ѕвездите на доделување на Оскари?

Првото доделување на Оскарите беше на 16-ти мај, во далечната 1929-та. На настанот присуствувале 250 луѓе, а целата манифестација завршила за 15 минути.

Уште поинтересно е што победниците биле познати цели 3 месеци пред да ја добијат наградата.

Денес Оскарите се најпрестижната манифестација во филмската индустрија и се настан што го следат милиони луѓе од целиот свет.

И иако фокусот е на филмовите од изминатата година и изведбата на актерите, Оскарите не минуваат без модата на црвениот тепих.

Но, што се случува со сите гламурозни фустани откако ќе заврши настанот?

Подготовка за церемонијата

Подготовките за главниот настан почнуваат околу 3 месеци пред церемонијата. За секоја ѕвезда се грижи цел тим нутриционисти, козметичари, тренери, фризери, стилисти и мејкап артисти.

Задачата на стилистот не е само да ја смисли модната комбинација, туку треба да размислува и за дизајнерите. Тој, или таа, проверува кој друг ќе носи облека од истиот бренд, за целосно да се избегне можноста двајца да се појават со иста облека.

По правило, стилистот одбира неколку комбинации – една за главниот настан, една за забавата после Оскарите, но и една во случај нешто да не оди по план.

Притоа, стилистот секогаш ја придружува ѕвездата за ако се случи некоја незгода, да може да ја среди.

Како се одвива соработката?

Црвениот тепих е одлична реклама за познатите брендови. Па, брендовите соработуваат со славните со надеж дека тие ќе се појават со нивна креација на црвениот тепих и на забавата после Оскарите.

Оваа соработка може да се одвива на неколку начини.

Познатите неретко имаат договори со модните куќи. На пример, Шарлиз Терон соработува со Dior, а Кејт Бланшет е лицето на Armani. Со договорот се одредува колкупати ѕвездата треба да се појави со облека од брендот.

Фустанот што ќе го избере познатата личност е ексклузивен и се шие само за неа.

Но, бидејќи ѕвездите одбираат фустани од последните колекции, можете да ја видите истата креација и на модна писта, и на црвениот тепих. Кога станува збор за Оскарите, дизајнерите испраќаат околу 60 различни варијанти за кои чекаат одобрување.

Интересно е што големината на облеката е исклучително важна и ретко ќе најдете фустан што е поголем од XS или S. Токму поради ова, дури 6 дизајнери ја одбиле Мелиса Мекарти во 2012-та бидејќи, едноставно, немале поголема облека.

Колку чинат фустаните?

Знаевте ли дека независното купување облека за Оскарите се смета за неучтиво?

До 80-тите, ѕвездите сами биле одговорни за нивниот изглед. Само оние од „највисок калибар“, како Грејс Кели и Елизабет Тејлор, можеле да се надеваат на соработка со модна куќа.

Џорџо Армани е првиот кој го искористил црвениот тепих како рекламен простор. Наскоро му се придружил и Џани Версаче, па набрзо сите ѕвезди биле облекувани од најголемите модни куќи.

Но, кој плаќа за овие гламурозни фустани?

Самите дизајнери. Тие им „плаќаат“ на познатите со фустаните што им ги даваат за Оскарите. Цената на фустан за црвениот тепих е од 150.000 долари па нагоре.

Ако ѕвездата се согласи, таа добива мала сума, стилистот добива процент од трансакцијата, а брендот добива реклама.

Некогаш, пак, ова рекламирање е на пријателска основа. На пример, Џаред Лето е добар пријател со Алесандро Мишел од Gucci, па на сите важни настани носи облека од овој бренд.

Слична е приказната и со Бјорк и познатиот „фустан-лебед“ од Оскарите во 2001-ва. Пејачката е добра пријателка со македонскиот дизајнер Марјан Пејоски, па решила да облече негова креација.

Каде ѕвездите ги чуваат фустаните?

Ѕвездите не ги поседуваат фустаните, па не ги чуваат никаде. И покрај тоа што моделите се шиени специјално за нив, тие сепак ѝ припаѓаат на модната куќа. Најчесто, ѕвездите имаат 48 часа да ја вратат облеката.

Многу ретко ја добиваат облеката на подарок, и тоа од неколку причини:

- Цената на само еден фустан е неколку стотици илјадници долари, некогаш и милиони. На пример, жолтиот фустан на Никол Кидман е проценет на 2 милиони долари. Ова, очигледно, е прескап подарок.

- На ѕвездите едноставно не им требаат овие фустани. Сигурно нема да ги облечат вторпат.

Што се случува со фустаните после церемонијата?

Големите модни куќи ги складираат нивните фустани во архив. Некои креации се вистински ремек-дела и си добиваат култен статус, а потоа или се продаваат или завршуваат на изложби.

На пример, фустанот на Одри Хепберн беше продаден за 130.000 долари во 2011. Црвениот фустан на Натали Портман беше продаден за 50.000 долари.

Најчесто, фустаните ги купуваат приватни колекционери.

Во САД, пак, многу е познато изнајмувањето облека што ја носеле ѕвездите на важни настани.

Уште неколку факти за „оскаровските“ стајлинзи:

1. На црвениот тепих има личност чија задача е да ги исправа и поправа фустаните.

2. После Оскарите во 2015-та, фустанот на Лупита Нионго беше украден. Крадците успеале да влезат во собата на актерката, но неколку дена подоцна го вратија фустанот.

3. Низ историјата, многупати Оскарот го добиле актерки кои носеле Valentino фустан на доделувањето.

4. Во 2003-та, само неколку часа пред црвениот тепих, фустанот на Салма Хајек се скинал. Напомош дошла Рис Витерспун, која ѝ го позајмила резервниот фустан.

5. Во 1998-ма, актерката Шерон Стоун се појави на церемонијата со бела кошула на сопругот и сатенско здолниште.

6. Најскапиот накит во историјата на церемонијата го носеше Лејди Гага во 2019-та. Се проценува дека накитот чини 30 милиони долари, а некогаш ѝ припаѓал на Одри Хепберн.

Спирова С. | Црнобело