Најдобрата Божиќна реклама: Осамениот дедо на месечината (видео)

Најновата божиќна реклама на британската компанија „John Lewis“ ја најави сезоната на празниците на најубавиот можен начин.

Ако сте заборавиле која е „John Lewis“ само сетете се на слаткиот заљубен пингвин од минатата година или на заспаната мечка која никогаш порано не го прославила Божиќ заедно со другите животни покрај украсената елка.

Оваа година „John Lewis“ ни претставува една нова приказна полна со емоции. Малечката Лили гледајќи низ својот телескоп го забележува дедото кој сам живее на месечината.

Забележувајќи ја неговата тага и осаменост, смислува начини на кои ќе му покаже дека всушност и не е така осамен и дека таму некаде на земјата постои некој кој мисли на него.   

Убавата приказна како и секогаш е проследена со одлична музика. Оваа година тоа е песната „Half the World Away“ на Oasis, отпеана од норвешката пејачка Аурора Акснес.

Идејата зад рекламата се должи на тажната статистика дека милион стари лица во Британија поминуваат дури и по еден месец во самотија, без да разговараат со никого. Од компанијата се надеваат дека нивната реклама ќе придонесе за покревање на свеста за старите лица, не само во Велика Британија туку и низ целиот свет.

М.С. | Црнобело