Се запознале додека биле заглавени во воз во Белград: Филмската љубовна приказна на Швеѓанка и Шкотланѓанец

Нина и Дерек се запознале во 1990-та, на воз кој два дена бил заглавен на станица во Белград поради штрајк. Оттаму, поминале неколку дена во Грција, а кога се вратиле во родните земји не престанале да се допишуваат. Денес тие се во среќен брак и нивната љубовна приказна е како на филм.

Нина Андерсон од Шведска и Дерек Баркли од Шкотска се запознале во 1990-та, несвесни дека нивната средба ќе прерасне во убава, филмска љубовна приказна.

Кога првпат се сретнале, биле во своите рани 20-ти, а денес се во среќен брак и ја споделуваат нивната приказна за CNN.

Во 1990-та, тогаш 20-годишната Нина и нејзината пријателка Лоа биле на патување со воз од Будимпешта до Атина.

Патувањето требало да трае околу четири дена.

Од Будимпешта до Белград патувале со еден воз, а во престолнината на Србија требало да се качат во друг и да го продолжат патувањето до Атина.

Во вториот воз, Нина и Лоа успеале да си зафатат купе и мислеле дека ќе бидат сами, кога на вратата затропале три момчиња на иста возраст како нив.

„Кога затропаа, од вратата се појавија три глави – беа Англичанец, Шкотланѓанец и Ирец, како да почнува некој виц“, раскажува Нина.

Нина, Лоа и две од трите момчиња

Момчињата им кажале дека едвај го фатиле возот и ги замолиле да седат во нивното купе.

Нина вели дека иако сите тројца биле мошне фини, Шкотланаѓнецот Дерек најмногу ѝ го привлекол вниманието.

„Ми се допадна бидејќи беше директен, но не и неучтив. Делуваше поразлично од неговите пријатели и ми изгледаше како интересна личност“.

Петте патници во купето разговарале долг период, пред да сфатат дека возот воопшто не се поместил.

И, тогаш дознале дека работниците штрајкуваат и дека е неизвесно колку долго возот ќе стои на станицата.

Дерек раскажува дека иако се запознале во купето, тој веќе ја забележал Нина на железничката станица во Будимпешта и му го привлекла вниманието.

Дури сакал и да ѝ пријде, но оттаму се качил во друг воз за Белград.

„Заспавме во првиот воз и со трчање излеговме да ја фатиме линијата до Атина“, се присетува Дерек.

Нина и Дерек во 1990-тите

Иако возот стоел во место, петте патници со купето си поминувале одлично.

Споделувале животни приказни, се шегувале и си ја делеле храната што ја носеле со себе.

Тие останале во возот цели два дена во кои Нина и Дерек навистина се зближиле.

Конечно, возот тргнал, но како што се доближил до грчката граница застанал и на патниците им рекле да се симнат.

„Беше страшно бидејќи се сеќавам дека беше ноќ и не знаевме што се случува.

Само ни рекоа да излеземе од возот и нè упатија кон автобуска станица. А, на станицата требаше да се бориме за место во автобусот“, раскажува Нина.

Нина и Дерек во 1990-тите

Нина, Лоа и трите момчиња одлучиле да го продолжат патот до Атина како група бидејќи веќе се зближиле.

Кога стигнале во Атина, Нина и Дерек требало да се разделат – таа и Лоа фатиле брод до островот Егина, каде што биле договорени да се сретнат со пријатели од Шведска.

Раскажувајќи за CNN, и Нина и Дерек велат дека биле тажни за разделбата бидејќи не очекувале некогаш повторно да се сретнат.

Сепак, бидејќи немале конкретни планови, по три дена во Атина, Дерек и пријателите решиле и тие да одат на островот.

Продолжува на следната страница...