5 скриени причини зошто се чувствувате несреќно и под стрес

Дали си задавате премногу обврски во текот на денот, па немате време да ги завршите сите? Можеби затоа постојано сте под стрес и се чувствувате несреќно.

Обично мислиме дека причината зошто сме несреќни или под стрес е очигледна, како проблеми на работа или со партнерот.

Сепак, постојат и скриени работи на кои обично не би помислиле.

Па, ако немате објаснување за негативните емоции, можеби се соочувате со нешто од следниве проблеми:

Немате време за сите ваши обврски

Дали дури и кога цел ден сте биле продуктивни, сепак се чувствувате несреќно и незадоволно од себе?

Тогаш размислете дали можеби си задавате премногу обврски во текот на денот.

Речиси невозможно е во еден ден да отидете на работа, да зготвите ручек и вечера, да одите во теретана, па и да направите генералка во домот.

Ако ова е вашиот проблем, почнете да си правите листи со обврски.

Најпрво одредете што ви е приоритет, па потоа реалистично размислете за кои други обврски ќе имате време во текот на денот.

Не мора сè да направите во еден ден, туку распоредете ги обврските во текот на неделата.

Не одвојувате време за себе

Кога сте преплавени со обврски, веројатно не ни помислувате да одвоите време за себе.

А, можеби дури и чувствувате вина ако се релаксирате и не сте продуктивни.

Важно е да знаете дека одморот и времето за себе се неопходни.

Не мора веднаш по работа да трчате да завршите со сите други задачи, туку дајте си време да одморите.

И, барем еднаш неделно правете нешто што ве релаксира и ви причинува задоволство.

Не спиете доволно

Можеби не се чувствувате поспано и уморно, но ако спиете по едвај пет-шест часа навечер, секако дека ќе има последици.

Некогаш тие последици се чувство на тага и поголема чувствителност на стрес.

Не треба да го запоставувате спиењето бидејќи може да се одрази и на физичкото, и на менталното здравје.

Осамени сте

Само затоа што постојано сте опкружени со луѓе или имате партнер, не значи дека е невозможно да сте осамени.

Размислете како се чувствувате во друштво на вашите пријатели или партнерот – дали ве слушаат кога зборувате, дали можете да се потпрете на нив…

Ако не можете да одговорите потврдно на ваквите прашања, можеби ви требаат позначајни врски во животот.

Доколку никако не можете да се ослободите од ова чувство, слободно разговарајте и со професионалец.

Не живеете во сегашноста

Можеби постојано сте загрижени за она што ќе се случи утре или по неколку години.

А, можеби и постојано мислите на некои грешки од минатото, па никогаш не сте присутни во сегашниот момент.

Ова, секако, ќе резултира со негативни емоции, како тага и анксиозност.

Кога ќе забележите дека мислите ви залутале во некое друго време, пробајте да се фокусирате на сегашноста и на она што го првите во моментот.

Спирова С. | Црнобело