Најлесно се откриваат со магнет - Во што се разликуваат лажните монети од 2 евра од вистинските?

Обрнете внимание на изгледот, тежината и големината на монетите... Како да препознаете лажни монети од 2 евра, со кои се преплавени голем број земји од Европа?

На прв поглед, речиси и да не може да се забележи разлика и тешко е да заклучите дали монетата од 2 евра што сте ја добиле е вистинска или лажна, но постојат суптилни разлики, на кои особено треба да внимавате.

Во последните неколку години земјите како Шпанија и Португалија мака мачеа со лажните монети од 2 евра, а според голем број од странските новински агенции, Косово целосно е преплавено со вакви лажни пари, па некои од бизнисите одлучиле воопшто да не прифаќаат да наплатат со монета од 2 евра.

Доказ дека овие монети се толку многу застапени низ земјите во Европа е и тоа што, фотките со лажни монети од 2 евра редовно се споделуваат на Reddit, каде корисниците ги раскажуваат своите искуства со нив во Германија, Хрватска, Косово итн.

На кои работи треба да обрнете внимание кога ќе добиете монета од 2 евра и како да се уверите дека е оригинал?

На допир лажните монети секогаш се малку полесни од оригиналните и може да се разликуваат и во големината. Ако забележите дека монетата е неприродно лесна, тогаш добро е да обрнете внимание и на другите безбедносни детали.

Исто така, лажните монети може да бидат помали од оригиналните во дијаметар или да бидат потенки.

Лажните монети речиси секогаш се посјајни од оригиналните. Кај фалсификатите, забележително е дека сребрената и златната боја се понагласени, а разлика може да се забележи и во самата текстура на материјалот од кој е изработена монетата.

На предната страна од монетата, треба да се обрне внимание на деталите што се отсликани на неа (знамето на Eвропа, деноминацијата, односно бројот, треба да бидат јасно видливи). На задната страна обрнете внимание како е отпечатен грбот на земјата и бројот на ѕвездите (12).

На допир, секој детаљ треба видно да се разликува и да биде поткренат во однос на основата на монетата.

Исто така обрнете внимание на фонтот со кој е напишан зборот EURO, ѕвездите и мапата треба да бидат со правилен облик.

Исто така добро е да се обрне внимание на страничниот дел од монетите. Назабувањата на рабовите кај сите монети од по 2 евра треба да се еднакво оддалечени и написите треба да бидат центрирани. Ова, вообичаено не е случај кај фалсификатите.

Лажните монети може да се откријат и со помош на магнет. Кај монетите од 1 и 2 евра, најчесто средишниот дел благо се магнетизира, додека надворешниот дел нема магнетски способности.

Монетите од 10, 20 и 50 центи не се лепат на магнет, а монетите од 1, 2 и 5 центи веднаш се магнетизираат.

Ако на прв поглед забележите дека некој се обидува да ви подметне лажна монета, најдобро е да не прифатите да ја земете. Исто така, ако забележите дека некоја монета наликува на лажна најдобро е да ја однесете во банка за да ја проверите.

Б. С. Б. | Црнобело