Исповед на маж: „Јас сонувам за деца, а девојките за совршен дечко за на Инстаграм - очаен сум“

„Јас сум добро момче. Секогаш ги третирам жените добро, им купувам цвеќе, им кажувам дека ги сакам и дека се убави, ама жените бараат совршен дечко за Инстаграм и јас не сум најфотогенична личност“ – стои во писмото на мажот што стравува дека му минува времето и нема да ја најде сродната душа за да добие дете. Дали на мажите што не се премногу фотогенични им е проблем да најдат девојка?

Кога ќе се спомне терминот „биолошки часовник“ веднаш помислуваме на жените и на женската популација. Но, потребата за формирање семејство не е само женски проблем, постојат и мажи што се нетрпеливи да формираат семејство и да станат родители. 

Во таа насока е и писмото што еден анонимен писател го испратил до колумнистката на британскиот весник The Sun, Дидре, каде говори за тоа со какви проблеми се соочува затоа што не е премногу фотогеничен и девојките не сакаат ниту да му дадат шанса.

Во продолжение проследете го неговото писмо во целост:

„Драга Дидре,

Јас сум сингл маж и очаен сум да бидам татко. Го чувствувам отчукувањето на биолошкиот часовник и очаен сум да најдам девојка, но немам среќа.

Очајно се обидувам да најдам девојка и да имам бебе.

Јас сум добро момче. Секогаш ги третирам жените добро, им купувам цвеќе, им кажувам дека ги сакам и дека се убави. За жал се чини дека тоа не е доволно повеќе.

Жените бараат совршено Инстаграм момче и јас не сум најфотогенична личност. Ако не направиш пластична операција за да го направиш лицето совршено за фотографии немаш никакви шанси.

Дури ги разгледав можностите за сурогат-мајки, но многу се скапи. Сакав да станам татко уште откако се роди внука ми пред десет години.

Мојот живот ќе биде празен ако не станам родител. Имам 37 години и чувствувам дека немам повеќе време и опции. Навистина ми се крши срцето.“

Според Дидре, овој маж треба да направи неколку клучни измени и да поработи на себе, доколку сака да го постигне тоа што го сака. Како што вели, не е до Инстаграм, туку проблемот е во тоа што тој има погрешен пристап кон целата ситуација, па му порачува:

„Престани да се споредуваш себе со другите мажи на Инстаграм – голем дел од нив ги обработуваат овие фотки во Фотошоп пред да ги објават.  

Потребно ти е да го промениш пристапот и да се обидеш прво да стекнеш пријателство со девојките, па потоа да започнеш романтична врска.

Ако си премногу фокусиран на тоа да добиеш бебе, звучиш очајно и тоа не им се допаѓа на жените.“

Што мислите вие? Дали на мажите што не се премногу фотогенични им е проблем да најдат девојка?

Б. С. Б. | Црнобело