„Имав 146kg – не ми дозволија да влезам во болнички хеликоптер со ќерка ми и решив да ослабам“

Детали

вторник, 09 јули 2024

Даниел од САД ослабела над 90 килограми откако не ѝ било дозволено да влезе во болнички хеликоптер кој ја пренесувал ќерка ѝ до болница. По овој настан, таа почнала да се храни здраво и да вежба, а добила и инјекции за слабеење од лекар, и сега се надева дека ќе собере пари за да го отстрани вишокот кожа од стомакот.

Даниел Хачинсон од САД тежела 146 килограми, а сфатила дека е време да промени нешто кога ќерка ѝ морала да биде пренесена во болница со хеликоптер.

Тогаш, болничарите ѝ рекле на Даниел дека е ризично и таа да влезе во хеликоптерот поради нејзината тежина.

До денес, 32-годишната мајка на две деца има ослабено над 90 килограми.

Сега таа ја споделува својата приказна со надеж дека ќе ги мотивира другите кои биле во слична положба да почнат да работат на себе.

Во декември 2022 година, ќерката на Даниел добила напад на астма и не можела да дише.

Девојчето, кое тогаш имало околу две години, морало веднаш да биде пренесено во болница.

За таа цел, болницата испратила хеликоптер, но кога Даниел пробала да влезе внатре, не ѝ дозволиле.

Болничарите ѝ рекле дека е премногу тешка и постои ризик од претовар. Па, Даниел отишла до болницата со автомобил.

Младата мајка вели дека овој миг бил пресвртна точка во нејзиниот живот и одлучила да направи драстична промена.

„Имав прекумерна тежина скоро целиот живот. Грижата за себе никогаш не ја гледав како приоритет, туку поважни ми беа децата.

Но, кога не можев да бидам со ќерка ми во хеликоптерот, сфатив дека ако не се грижам за себе, нема да можам да се грижам ни за децата“, раскажува Даниел.

Таа се присетува и на ситуацијата со хеликоптерот.

„Сакаа веднаш да ја однесат ќерка ми во болница, но во близина ги немаа потребните машини. Па, единствена опција беше да ја однесат со хеликоптер во друга, подалечна болница.

Болничарите ми кажаа дека на хеликоптерот има ограничување за тежина. Ме измерија и ми рекоа дека мојата тежина, во комбинација со пилотот и медицинскиот персонал, може да биде опасна.

За мене ова беше шок. Сопругот мораше да остане со другото дете дома, а ќерка ми требаше сама да оди со хеликоптер. Ми се скрши срцето што морав да ја оставам сама“.

Наредните неколку месеци, главниот фокус на Даниел станало слабеењето.

„Бев со ќерка ми во болница околу една недела и кога се вратив дома, фрлив сè од фрижидерот и почнав да истражувам за здрава исхрана.

Почнав со мали промени, како поздрав појадок. Престанав да пијам благи пијалаци и ја намалував порцијата на оброците. Си поставував мали, достижни цели и гледав напредок“.

Извесен период, Даниел примала и инјекции за слабеење препишани од лекар.

А, вели дека покрај тоа што била поздрава, забележувала и други позитивни промени.

„Мислам дека бев најсреќна кога ќерка ми ме прегрна и нејзините дланки се допреа зад мене. Постојано мислев на храна и се чувствувам послободно што повеќе храната не ми е опсесија.

Претходно не можев да се возам на ролеркостер во забавен парк, не можев да си ги прекрстам нозете…

Сега можам да ги правам сите овие работи. Уште сум изненадена кога ќе се погледнам во огледало“.

Сепак, драстичното слабеење ја оставило Даниел со многу вишок кожа, а открива дека операцијата за отстранување чини 9.000 долари.

„Треба да се ослободам од вишокот кожа на стомакот. Досега трипати одбиваа да ми ги покријат трошоците со здравственото осигурување.

Кожата ми пречи и секако не изгледа убаво. Сега се надевам дека ќе соберам пари за операција“.

Спирова С. | Црнобело