Надал го одигра последниот меч во кариерата и се збогува со емотивен говор: „Сакам да ме помните како добар човек од мало село во Мајорка“

Детали

среда, 20 ноември 2024

Откако го изгуби својот последен меч, Рафаел Надал одржа емотивен говор со кој им се заблагодари на фановите, тимот и семејството, но и ја покажа својата скромност.

Рафаел Надал ја заврши блескавата 20-годишна кариера, откако го изгуби мечот во Дејвис Купот.

38-годишниот тенисер играше за Шпанија и изгуби против Холандија, а крајот на кариерата го одбележа со емотивен говор.

За тоа дали е задоволен од крајот на кариерата, тој изјави:

„Не, задоволувачки е да му дадеш поен на тимот. Но, ова не се случи, го изгубив мојот меч.

Но, во овој миг до мојата кариера, не можам многу да се жалам. Го дадов најдоброто од себе, пробав да уживам и да играм со вистинската енергија. Едноставно, не успеав.

На некој начин добро е што ова беше мојот последен натпревар – го изгубив мојот прв меч на Дејвис Купот, а го изгубив и последниот. Па, го затворив кругот“.

На тенискиот терен се одржа церемонија во чест на познатиот тенисер, а Надал ја искористи можноста да му се заблагодари на семејството, на тимот, но и на бројните фанови од Шпанија кои го следеа натпреварот.

„Имав 20-годишна професионална кариера во која вие ме водевте низ добрите времиња и лошите, и ме туркавте да продолжам да играм…

Сакам да ѝ честитам на Холандија и да му се заблагодарам на целиот шпански тим што е овде, што ми дозволи повторно да играм во Дејвис Купот, што не помина како што сите сакавме. Го дадов најдоброто од себе.

Поминав многу важни моменти од кариерата со оние кои се овде, беше привилегија. Постигнавме бројни убави нешта и сега вам ви е редот да продолжите...

Вистината е дека никогаш не сакате да стигнете до оваа точка. Јас не сум уморен од играње тенис, но моето тело повеќе не сака да игра, и морам да го прифатам тоа.

Се чувствувам привилегирано затоа што долго време моето хоби ми беше професионална кариера“.

На видеобимот беше прикажано видео со инсерти од кариерата на тенисерот, но и говори во негова чест од страна на Федерер, Ѓоковиќ, Бекам, Серена Вилијамс…

Додека ги слушаше говорите, Надал едвај ги додржуваше солзите.

„Титулите, бројките се овде, па луѓето сигурно веќе ги знаат. Но, повеќе би сакал да бидам запомнет како добра личност од мало село во Мајорка.

Имав среќа што чичко ми беше тениски тренер во моето село кога бев мал и што имав прекрасно семејство кое можеше да ме поддржува.

Само дете кое ги следеше своите соништа, работеше напорно за да стигне каде што сум денес...

Но, многу луѓе го даваат најдоброто од себе, секој ден. Јас имав многу среќа во животот, имав можност да живеам, доживеав незаборавни искуства поради тенисот.

Сакам да бидам запомнет како детето кое постигна повеќе отколку што сонуваше“, додаде тенисерот.

Во продолжение видео од церемонијата во чест на пензионирањето на Надал:

Спирова С. | Црнобело