„Не сум подготвен да умрам“: Крис Хемсворт ќе прави пауза од актерската кариера – има ген кој го зголемува ризикот од појава на Алцхајмер

Детали

понеделник, 21 ноември 2022

Крис Хемсворт, попознат како Тор од филмовите на Марвел, најави пауза од актерската кариера откако открил дека има ген кој драстично го зголемува ризикот од појава на Алцхајмер. Актерот изјави дека сака да минува повеќе време со сопругата и трите деца, истакнувајќи дека не е подготвен да „замине од овој свет“.

Крис Хемсворт, актерот најпознат по улогата на Тор во филмовите на Марвел, најави дека ќе прави пауза од актерската кариера поради загриженост за здравјето.

Во интервју за Vanity Fair, 39-годишниот актер откри дека се одлучил на овој потег откако дознал дека има предиспозиции за Алцхајмер.

Кога ги доби лошите вести, актерот снимаше епизода за документарната серија Limitless, каде што се истражува нашата смртност, како и желбата за вечен или барем подолг живот.

Ова го натерало да почне да размислува за сопствената смрт, по што одлучил да направи пауза.

„Работењето на епизода за смртта и соочувањето со мојата смртност ме натераа да паузирам. Боже, уште не сум подготвен да си заминам од овој свет“.

„Навистина поттикна нешто во мене што ме натера да земам одмор. Завршив со серијата и веќе привршував со останатите договори“.

Актерот изјави дека сега сака да минува многу повеќе време со сопругата Елса Патаки и нивните три деца – 10-годишната ќерка и 8-годишните близнаци.

Актерот направи детална крвна слика за потребите на серијата Limitless и резултатите покажаа дека има од 8 до 10 пати поголеми шанси да развие Алцхајмер за разлика од просечниот човек.

Крис спаѓа во само 2-3% од населението кои го имаат генот којшто го зголемува ризикот од појава на Алцхајмер.

Иако прогнозата звучи застрашувачки, според Американскиот центар за контрола и превенција на болести, ова не значи дека актерот дефинитивно ќе се соочи со болеста.

Односно, со некои промени во животните навики – како откажување од алкохол и цигари – може да го намали ризикот.

Актерот самиот изјави дека сега ќе води уште подобра грижа за своето здравје и ќе направи сè во негова моќ за да го спречи појавувањето на болеста.

Во новата серија Limitless, актерот ги тестира телото и умот до максимум изведувајќи разни екстремни активности како пливање во многу студена вода.

Иако нам ни е познат како актер, Крис е и многу добар атлет кој се подложува на ригорозни тренинзи, особено кога се подготвува за улога.

Спирова С. | Црнобело