Не се будеше за помалку од 10.000 долари, признава дека операциите ја деформирале – Факти за Линда Еванџелиста
- Детали
- сабота, 25 септември 2021
Заработуваше по 10.000 долари дневно, нејзиниот ритуал за добар изглед вклучуваше 26 производи дневно, а тврди дека останала деформирана по процедура за подмладување. Во продолжение неколку интересни факти за Линда Еваџелиста.
Некогаш заработуваше по 10.000 долари дневно, а денес признава дека живее осамен живот, затворена од светот и од јавноста, затоа што по една процедура за подмладување останала во целост деформирана. Линда Еванџелиста на Инстаграм отворено призна зошто во последните пет години се крие од јавноста.
Линда Еванџелиста (56) во својата кариера се појавила на над 700 насловни страници. Нејзината фраза: „Не се будам за помалку од 10.000 долари“ ќе остане запаметена како фраза што ја одбележа нејзината кариера.
За неа велеа дека е „Камелеон“ затоа што постојано го менуваше изгледот, што не е вообичаено кај другите модели кои постојано се трудат да го задржат истиот изглед без некои поголеми и драстични промени.
Таа беше дел од големата петорка, односно првите пет манекенки што заработуваа поголеми суми на пари, заедно со Синди Карфорд, Наоми Кемпбел, Кристи Тарлингтон и Калудија Шифер.
Линда во својата кариера успеа да заработи околу 40 милиони долари, што е сосема солидно, ако се земе предвид дека оваа сума ја заработила само како модел, без да се впушти во други дополнителни инвестиции, како што тоа го прават голем број други познати личности.
Во интервју од 2018-тата година Линда говореше за процесот на стареење, за тоа како ги доживува социјалните мрежи, но и за тоа како изгледале нејзините ритуали за убавина во миговите кога била на врвот на кариерата, во 80-тите и 90-тите години на минатиот век.
Ако го разгледате нејзиниот Инстаграм профил, ќе забележите дека меѓу последните фотографии што таа ги објавила од себеси е една од фотосесија за магазинот InStyle од 2017-тата година и дека речиси и да нема понова фотографија.
„На почетокот објавував неколкупати фотографии од себеси во природно издание, а добивав коментари од типот: ‘Што ѝ е, да не е болна?’. Луѓето очекуваат да изгледам како на фотографиите за италијанскиот Vogue, за кои што биле потрошени четири часа само на фризура и на шминка. Така, кога ќе им ја дадете реалноста, таа не им се допаѓа“ – изјави Линда во 2018-тата година.
Таа во тоа време тврдеше дека во целост го прифаќа стареењето, но дека не е против ниту третманите за подмладување, како ботокс, филери, ласер...
Низ годините таа се обидувала да го оддржи младешкиот изглед, а нејзината рутина за убавина во еден период вклучувала 26 различни производи.
Линда Еванџелиста деновиве повторно е актуелна, откако на Инстаграм јавно објави зошто цели пет години се крие од јавноста.
Призна дека по две болни и неуспешни операции за подмладување со смрзнување на клетките останала во целост деформирана и непрепознатлива.
„Развив Paradoxal Adipose Hyperplasia, а за овој ризик не ме информираа пред да започнам со процедурите“ – вели таа.
Paradoxal Adipose Hyperplasia е ретка појава што се јавува кај лицата што практикуваат третмани со смрзнување на клетките, а кај лицата што страдаат од неа, местата што биле третирани со смрзнување, наместо да се намалат, стануваат поголеми.
Линда во објавата на Инстаграм вели дека поради оваа појава западнала во длабока депресија и почнала да живее целосно повлечен живот.
Таа најави тужба, а вели дека иако повеќе не наликува на себеси, сепак сака да си замине со исправена глава.
Линда за последен пат во јавноста беше забележана во 2016-тата година, погледнете дел од фотографиите од тој период:
Б. С. Б. | Црнобело
Би можело да ве интересира:
Препорачуваме
Најчитани неделава
