Номинација за Греми, талент за шминкање – што сè има постигнато ќерката на Бијонсе до 9-иот роденден?

Детали

петок, 08 јануари 2021

Песната на којашто соработуваше со мајка ѝ има номинација за Греми, се појавува како наратор на аудио книга, а има добиено и престижна награда - малата Блу Ајви дефинитивно ја наследила желбата за успех од родителите, иако многумина сметаат дека нема потреба од толку форсирање од најмала возраст.

Блу Ајви е најстарата ќерка на Бијонсе и Џеј Зи, а пред неколку дена, на 7-ми јануари, го прослави нејзиниот 9-ти роденден.

Иако Блу е само дете, изгледа нејзините родители сакаат да ја направат успешна уште сега. Со само 9 години, зад себе Блу има големи достигнувања и уште сега ѝ се предвидува блескава иднина.

Многумина сметаат дека Џеј Зи и Бијонсе многу ја форсираат и би требало да ѝ дозволат да ужива во нејзиното детство, но некои се воодушевени од нејзината желба за успех, која дефинитивно ја наследила до родителите.

Па, што сè има постигнато Блу Ајви до нејзиниот деветти роденден?

Има номинација за Греми

Блу Ајви отпеа неколку стихови од хитот на Бијонсе „Brown Skin Girl“, а воедно е и еден од текстописците. Песната доби номинација за најдобар музички спот и иако на почетокот името на Блу не беше наведено на листата артисти кои работеле на песната, подоцна беше додадено на официјалниот сајт на наградите.

Наратор на аудио книга

Во ноември 2020-та, авторот Метју А. Чери најави дека за аудио верзијата на неговата книга „Hair Love“ ја најмил Блу како наратор.

Книгата раскажува слатка приказна за татко Афроамериканец кој учи како да ѝ прави фризури на својата ќеркичка, додека неговата сопруга е во болница. На почетокот таткото е несмасен и не знае да направи ништо, но со помош на ќерка му успева да се подобри.

Може да биде оодлична шминкерка

Можеби малата Блу нема аспирации да стане мејкап артист, но дефинитивно има талент. Нејзината баба, Тина Ноулс, сподели фотографија околу Ноќта на вештерките покажувајќи како ја нашминкала Блу:

„Мојата Блу е одличен мејкап артист! Ме претвори во баба скелет!!“, стои во објавата.

Се има појавено во музички филм на Бијонсе

Иако Бијонсе е главната ѕвезда во нејзиниот музички филм „Black is King“, малата Блу дефинитивно привлече повеќе внимание. Таа се појави неколкупати во филмот, а имаше можност да ги покаже и нејзините танцувачки способности.

Покрај Блу, во филмот се појавија и другите деца на Бијонсе – Руми и Сер, како и Џеј Зи.

Ја има добиено наградата NAACP

Наградите NААCP им се доделуваат на луѓето со темна боја на кожата, кои оставиле голем белег во филмот, телевизијата, музиката или литературата.

Блу ја доби наградата минатата година во категоријата „Најдобра соработка“, за нејзината соработка со Бијонсе на хитот „Brown Skin Girl“.

Се појави на Billboard топ-листите уште како новороденче

Уште кога Блу не можеше да зборува, ни да оди, нејзиниот татко, Џеј Зи, ја направи дел од неговиот хит „Glory“. Во песната тој вметна снимка од плачењето на Блу, па на некој начин таа е најмладата личност чиј глас завршил на Billboard топ-листите.

Спирова С. | Црнобело